رووداو دیجیتاڵ
وەزیری ناوخۆی تورکیا رایگەیاند، پار نزیکەی 198 هەزار کەسیان دەستگیرکردووە، کە لەلایەن دادگەکانەوە فەرمانی دەستگیرکردنیان بۆ دەرکرابوو و بەشێکیشیان داواکراو بوون.
ئەمڕۆ پێنجشەممە، عەلی یەرلیکایا، وەزیری ناوخۆی تورکیا رایگەیاند، ساڵی 2024 لە ئەنجامی زنجیرە ئۆپەراسیۆنە بەردەوامەکانی "ئابڵووقە"دا کە لە 81 پارێزگای تورکیا و باکووری کوردستاندا بەڕێوەچوو، 197 هەزار و 940 تۆمەتباری داواکراو لەلایەن دادگەوە، دەستگیرکران.
وەزیری ناوخۆی تورکیا روونیکردەوە، 901 تۆمەتبار زیاتر لە 10 ساڵە داواکراون، هەزار و 249 تۆمەتبار زیاتر لە پێنج ساڵە و 195 هەزار و 790 تۆمەتباریش 1-5 ساڵە بە تۆمەتی جیاوازەوە داواکراون.
هەر بەپێی راگەیێندراوەکە، 71٪ی ئەو تاوانەی تۆمەتبارەکان کردوویانە؛ دزیکردن، فێڵکردن، ساختەکاری، تاڵانکردن، کوشتن، دەستدرێژی سێکسی، مادەی هۆشبەر، تیرۆر و قاچاخ بە هەموو جۆرەکانییەوە.
ئۆپەراسیۆنەکان بەهاوبەشی تیمەکانی پۆلیس، ئاسایش، جەندرمە و هەواڵگریی ناوخۆ دەستگیرکران و دوای تەواوبوونی لێکۆڵینەوەکان و نوێکردنەوەی دۆسێکانیان، رادەستی دادگە دەکرێن بۆ سزادانیان.
ئەم ئۆپەراسیۆنانەی وەزارەتی ناوخۆی تورکیا لە دژی تۆمەتبارە داواکراوەکان ئەنجامی دەدات، بەپێی بەرنامەیەکی تایبەتی مانگانە لەلایەن ژووری ئۆپەراسیۆنە تایبەتەکانی وەزارەتەکەوە بەڕێوەدەچێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ