رووداو دیجیتاڵ
یاریدەدەری سەرۆککۆماری تورکیا، رێککەوتنی ئاگربەستی واژۆکراو لەنێوان شەرع و مەزڵووم بە "پێشهاتێکی هیوابەخش" ناودەبات و رایدەگەیێنێت، وڵاتەکەی لە نزیکەوە چاودێریی پرۆسەی جێبەجێکردنی رێککەوتنەکە دەکات.
جەودەت یڵماز، لە هەژماری فەرمیی خۆی لە تۆڕی کۆمەڵایەتیی ئێکس، رایگەیاندووە: "رێککەوتنی ئاگربەست و یەکگرتنی تەواو کە لە سووریا راگەیێنرا، پێشهاتێکی هیوابەخشە بۆ داهاتوو، لە نزیکەوە چاودێریی پرۆسەی جێبەجێکردنی بڕگەکانی رێککەوتنەکە دەکەین. هیوادارین لە قۆناخی داهاتوودا لایەنەکان پابەندی بەڵێنەکانیان بن و پرۆسەکە بەرەو سەقامگیری ببەن، کۆتایی بەو پێکهاتانە بهێنرێت کە لە رابردوودا بەهۆی بۆشایی دەسەڵاتی ناوەندی و بە پشتیوانیی دەرەکی دروستبوون."
یاریدەدەری سەرۆککۆماری تورکیا نووسیویەتی، "سووریایەکی ئاوەدانکراوە بە تێگەیشتنێک کە یەکپارچەیی خاک و سەروەرییەکەی بەهێز بکات، هەموو پێکهاتەکان لەخۆبگرێت، نەک هەر لە بەرژەوەندیی گەلی سووریایە کە ئازارێکی زۆری چەشتووە، بەڵکو بۆ سەقامگیری و خۆشگوزەرانیی ناوچەکەش زۆر بەنرخە، بە جێبەجێکردنی رێککەوتنەکە؛ بازرگانی، نەوت و سەرچاوەکانی دیکە بۆ گەشەپێدانی سووریا بەکاردەهێنرێن، نەک بۆ تێکدانی."
لە کۆتایی پەیامەکەیدا، یڵماز جەخت دەکاتەوە: "وەک کۆماری تورکیا، بەردەوام دەبین لە پشتیوانیکردنی ئەو هەنگاوانەی دەسەڵاتی ناوەندی بەهێز دەکەن، بە تێگەیشتنێک کە هەموو گرووپە ئەتنیکی، مەزهەبی و ئایینییەکانی گەلی برای سووریا لەخۆبگرێت، برایەتیی تورک، کورد و عەرەب، بەهێزترین وەڵامە بۆ ئەو لایەنانەی کە حیساباتی جیاوازیان لەسەر سووریا هەیە و لەبری سەقامگیری، ئاگری ململانێ خۆش دەکەن."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ