رووداو دیجیتاڵ
لە ئۆپەراسیۆنێکی هێزە ئەمنییەکانی تورکیادا 143 کەس بەتۆمەتی بازرگانیکردن بە مادەی هۆشبەرەوە دەستگیرکران.
ئەمڕۆ شەممە، 19ـی نیسانی 2025، بەڕێوەبەرایەتیی گشتیی ئاسایشی تورکیا بڵاویکردەوە، ئۆپەراسیۆنێکی فراوان و هاوکاتیان لە 11 پارێزگای تورکیا و باکووری کوردستان دژی بازرگانانی مادەی هۆشبەر ئەنجام داوە.
بەگوێرەی راگەیێندراوەکە، ئۆپەراسیۆنەکە بەرەبەیان و بە هاوئاهەنگیی هێزەکانی ئاسایش، پۆلیس، جەندرمە و هەواڵگریی وەزارەتی ناوخۆ کراوە. هێزەکان لە هەر 11 پارێزگاکەدا هەڵیانکوتاوەتە سەر 166 شوێن.
لە ئۆپەراسیۆنەکەدا 143 گومانلێکراو دەستگیرکراون. دوای لێکۆڵینەوە و بردنە بەردەم دادوەر، پێنج گومانلێکراو بە مەرجی دادی ئازادکراون و 138 گومانلێکراوەکەی دیکەش بڕیاری دەستبەسەرکردنیان دراوە.
بەپێی ئاماری وەزارەتی ناوخۆی تورکیا، پار 44 هەزار و 824 ئۆپەراسیۆن دژی بازرگانانی مادەی هۆشبەر کران و لەو ئۆپەراسیۆنانەدا 72 هەزار و 421 گومانلێکراو دەستگیرکران کە 32 هەزار و 425 کەسیان بە زیندانیکردن سزادران. لە سەرجەم ئۆپەراسیۆنەکاندا دەستبەسەر 86 تۆن مادەی هۆشبەری جۆراوجۆر و 105 ملیۆن حەبی بێهۆشکەر لە سەرجەم جۆرەکاندا گیرا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ