هەڵەیەک روویدا! دووبارە هەوڵبدە
رووداو دیجیتاڵ
رەجەب تەیب ئەردۆغان، سەرۆککۆماری تورکیا رایگەیاند، دادگە لێپێچینەوە لە تەواوی ئەو کەسانە دەکات کە هۆکاری رووداوی سووتانی هۆتێلەکەی بۆڵو بوون.
لە گوتارێکیدا کە ئەمڕۆ شەممە 25-1-2025، لە کۆبوونەوەی ئامادەکاری بۆ هەشتەمین کۆنگرەی ئاکپارتی لە پارێزگای ئێسکیشەهیر پێشکێشیکرد، ئەردۆغان باسی لە رووداوی سووتانی هۆتێلەکەی پارێزگای بۆڵو کرد کە تێیدا 78 کەس گیانیان لەدەستدا.
سەرۆککۆماری تورکیا گوتی: "ئۆرگانەکانی دادگە، لێپرسینەوە لەگەڵ یەک بە یەکی ئەو کەسانە دەکات کە بەرپرسیارن لە گیانلەدەستدانی 78 کەس. پێویستە هەموو کەسێک واز لەو قسانە بهێنێت کە کاری دادگە سەخت دەکەن و تۆمەتی بۆ دروست دەکەن".
لەکاتێکدا سەرۆکی شارەوانیی بۆڵو لەلایەن پارتی گەلی کۆماری (جەهەپە) بەڕێوەدەبردرێت و حکومەتیش لەلایەن ئاکپارتی، ئەمە بووەتە هۆی دروستبوونی دەمەقاڵێی سیاسی.
ئەردۆغان بە ناڕاستەوخۆ رووی دەمی لە تانژو ئۆزجان، سەرۆکی شارەوانیی بۆڵو کرد کە جەهەپەییە و گوتی: "هێشتا تەرمەکان بە خاک نەسپێردرابوون و ماڵباتی قوربانییان لە نێو خەمدا بوون، کەسانێک بە زمانێکی هێرشکارانە، رووداوی سووتانەکەیان کردە کەرەستەی سیاسی. ئێمە ئەوان حەواڵەی ویژدانی مەحشەر دەکەین".
ئەردۆغان هەڵسوکەوت و گوتەکانی ئۆزجان و بەرپرسانی دیکەی جەهەپەی بە دوور لە ئەدەب وەسفکرد و سەرکۆنەی کرد.
کاژێر 03:30ی بەرەبەیانی رۆژی 21-1-2025، ئاگر لە نهۆمی چوارەمی هۆتێلە 12 نهۆمییەکەی پارێزگای بۆڵوی تورکیا کەوتەوە و بەهۆیەوە تاوەکو ئێستا بەگوێرەی ئاماری دەوڵەت 78 کەس گیانیان لەدەستداوە و 51 کەس بریندار بوون.
هۆتێلەکە دەکەوێتە ناوەندی خلیسکێنەی سەر بەفر لە کارتاڵ کایا کە دەکەوێتە سەر لووتکەی چیای کۆرۆغڵو.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ