رووداو دیجیتاڵ
پاپا لیۆی چواردەیەم، لە رێوڕەسمێکدا لە تورکیا داوای یەکڕیزیی کریستیانەکانی کرد و پەیامێکی ئاراستەی جیهان کرد و گوتی، "پێویستە بە تووندی بەکارهێنانی ئایین بۆ پاساودان بە هەڵگیرساندنی جەنگ، ئەنجامدانی تووندوتیژی یان هەر شێوەیەکی پەڕگیری و دەمارگیری رەتبکەینەوە."
رۆژی هەینی 28-11-2025، لە دووەم رۆژی سەردانەکەیدا بۆ تورکیا، پاپا لیۆ چووە شاری ئیزنیکی باکووری رۆژئاوای تورکیا و لەگەڵ پاتریارک بارسۆلۆمیۆی یەکەم، سەرۆکی کریستیانە ئۆرسۆدۆکسەکانی جیهان، نوێژ و نزایان کرد.
پاپا لیۆی چواردەیەم رەخنەیەکی تووندی لە بەکارهێنانی ئایین بۆ تووندوتیژی گرت و گوتی، "ئەمڕۆ، هەموو مرۆڤایەتی کە بەهۆی تووندوتیژی و ململانێوە ئازاری چەشتووە، داوای ئاشتی دەکات."
پاپای ڤاتیکان هەروەها گوتی، پێویستە بە تووندی بەکارهێنانی ئایین بۆ "پاساودان بە هەڵگیرساندنی جەنگ، ئەنجامدانی تووندوتیژی یان هەر شێوەیەکی پەڕگیری و دەمارگیری رەتبکەینەوە."
پاپا لیۆ گوتی، لەبری ئەوانە، "ئەو رێگایانەی پێویستە بگیرێنەبەر، رێگەی کۆبوونەوەی برایانە، دیالۆگ و هاوکارین."
رێوڕەسمەکە لە بەردەم کەنیسەیەکی سەدەی چوارەم کە لەژێر ئاوی دەریاچەی ئیزنیکدایە، بەڕێوەچوو. لە ساڵی 325ی زایینیدا سەدان قەشە لەو شوێنە کۆبوونەوە و (باوەڕنامەی نیقییە)یان داڕشت، کە دەقێکە تاوەکو ئەمڕۆش چەقی ئایینی مەسیحی پێکدەهێنێت. ئەوکات بە شاری ئیزنیک دەگوترا نیقییە.
لە رێوڕەسمەکەدا، نزا بە چەندین زمان خوێندرایەوە و پاپا، کە هاووڵاتییەکی ئەمریکییە، بە زمانی ئینگلیزی گوتارێکی پێشکێش کرد و رایگەیاند، یادی کۆبوونەوەی نیقییە "دەرفەتێکی بەنرخە" بۆ ئەوەی بپرسین: "عیسای مەسیح لای هەر یەکێک لە ئێمە کێیە؟"
پاپا لیۆ رۆژی 27-11-2025 گەیشتە تورکیا و بڕیارە چوار رۆژ لەوێ بمێنێتەوە، دواتر رۆژی 3ـی مانگ بەرەو بەیرووت دەکەوێتەڕێ. دوێنێ پێنجشەممە لە کۆشکی کۆماری لە ئەنقەرە لەلایەن رەجەب تەیب ئەردۆغان، سەرۆککۆماری تورکیا پێشوازیی لێکرا و سەردانی مۆنیومێنتی ئەتاتورکی کرد. بڕیارە سبەی شەممە لە یارگەی ڤۆڵکسڤاگن لە ئیستەنبووڵ لەگەڵ کریستیانەکان نزا بکات، هەر رۆژی شەممە بڕیارە لە ئیستەنبووڵ سەردانی مزگەوتی سوڵتان ئەحمەد بکات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ