دەم پارتی لەبارەی دانوستاندن لەگەڵ حکومەتی سووریا: داوا دەکەین داواکارییەکانی کورد لەبەرچاو بگیرێن

 

 

تونجەر باکرهان، هاوسەرۆکی دەم پارتی، لە هەڤپەیڤینێکی تەلەڤیزیۆنیدا لەبارەی زۆر بابەتی پەیوەندیدار بە دۆخی باکووری کوردستان و تورکیا قسەی کرد. 

 

لە وەڵامی ئەو پرسیارەی کە هەڵوێستی چییە لەبارەی هەوڵەکانی حکومەتی تورکیا بۆ ئاساییکردنەوەی پەیوەندییەکانی لەگەڵ حکومەتی سووریا، باکرهان گوتی: "ئەردۆغان لەگەڵ ئێران کۆدەبێتەوە و نیازی هەیە لەگەڵ سووریاش کۆببێتەوە. ئێمە دژی ئەو کۆبوونەوە و دیدارانە نین. ئێمە لەگەڵ دیدار و گفتوگۆیەکین کە کوردیش لەخۆبگرێت و داواکارییەکانی لەبەرچاو بگیرێن. با ئەردۆغان لەگەڵ پەیەدەش کۆببێتەوە و گفتوگۆ بکات،هەروەک چۆن دەیەوێت لەگەڵ ئەسەد کۆببێتەوە. لە رابردوودا چەندین جار لەگەڵ پەیەدە گفتوگۆ کراوە؛ ساڵح موسلیم و ئاسیا عەبدوڵڵا چەندین جار سەردانی تورکیایان کرد و لەگەڵ بەرپرسانی باڵا کۆبوونەوە؛ ئەوە کارێکی زۆر باش بوو."

 

تونجەر باکرهان رایگەیاند: "لەبری دوژمنکاری، دەبێت دەستی تەبایی و دۆستایەتی درێژ بکرێت. دەبێت دەرفەت بە گەلی سووریا بدرێت بڕیار لەبارەی چارەنووسی بدات. کارێکی زۆر ئاساییە پەیوەندییەکانی تورکیا و سووریا پەرەیان پێبدرێت، بەڵام کاتێک باس لە داهاتووی سووریا دەکرێت، دەبێ کوردیش لەیاد نەکرێت"؛ گوتیشی: "دڵنیابن لەوەی نزیکبوونەوە لەگەڵ سووریا و ئەسەد لەسەر پێگە و دۆخی کورد دەبێت؛ مافەکانی رەت دەکرێنەوە و نکۆڵییان لێ دەکرێت."

 

هاوسەرۆکی دەم پارتی دۆخی ئابووریی وڵاتەکەی بە پرسی کوردەوە گرێدا و رایگەیاند: "سەرچاوەی خراپبوونی دۆخی ئابووریی تورکیا بۆ سیاسەتی دژایەتیکردنی کورد دەگەڕێتەوە؛ بۆ سیاسەتی جەنگ و بەرهەمهێنانی چەک و کڕینی تەکنۆلۆژیای سەربازی دەگەڕێتەوە"؛ گوتیشی: "لەگەڵ ئەوەداین ئاساییبوونەوە لە نێوخۆ و دەرەوە دەست پێبکاتەوە، بەڵام بە لۆژیکی مەهەپە ئەم کارە ناکرێت، بەهۆی ئەوەی مەهەپە فرەرەنگی رەتدەکاتەوە". 

 

ئەم گوتەیە لە کاتێکدایە، رۆژی هەینی سەرۆککۆماری تورکیا رایگەیاند: "هیچ هۆکارێک نییە رێگر بێت بۆ دەستپێکردنەوەی پەیوەندییەکان لەگەڵ سووریا". 

 

پەیەدە ساڵی 2003 دامەزرا و یەکینەکانی پاراستنی گەل (یەپەگە) و (یەکینەکانی پاراستنی ژنان) باڵی چەکدارییەتی. ئەو دوو هێزە چەکدارییەش لەنێو هەسەدەدا رۆڵێکی کارایان هەیە. 

 

حکومەتی تورکیا دەڵێت، پەیەدە لقی رۆژئاوای کوردستان و سووریای پارتی کرێکارانی کوردستان (پەکەکە)یە و هەربۆیە نەوەک تەنیا دانوستاندنی لەگەڵ ناکات، بەڵکو زۆرجاریش بۆردوومانی ئەو ناوچانە دەکات لە ژێر دەسەڵاتی هەسەدەدان.

 

تورکیا هەرێمی عەفرین و ناوچەی گرێ سپی و سەرێ کانی لە رێگەی ئەنجامدانی دوو ئۆپەراسیۆنی زەوینییەوە لە ساڵانی 2018 و 2019 خستە ژێر کۆنترۆڵی خۆی.