هەڵەیەک روویدا! دووبارە هەوڵبدە
رووداو دیجیتاڵ
هانزی فلیک، راهێنەری یانەی بارسێلۆنا ئامادەکاری دەکات بۆ ئەوەی یاریزانی تەمەن 19 ساڵ، دانی رۆدریگێز ئەمشەو یەکەم یاریی خۆی لەگەڵ تیپی یەکەم ئەنجام بدات، کە دەبێتە میوانی ریال ڤایادۆلید.
رۆدریگێز، کە یەکێکە لە بەرهەمەکانی ئەکادیمیای بەنێوبانگی لاماسیای بارسێلۆنا، لە پێکهاتەی یارییەکەدا دەبێت. ئەمەش لەکاتێکدایە کە فلیک دەیەوێت پێکهاتەکە بگۆڕێت پێش یاریی گەڕانەوەی قۆناخی پێشکۆتایی چامپیۆنزلیگ بەرامبەر ئینتەرمیلان لە هەفتەی داهاتوودا.
چاوەڕوان دەکرێت راهێنەرەکە پشوو بە هەندێک یاریزانی سەرەکی بدات و دەرفەت بدات بە بەهرەمەندە گەنجەکان.
رۆدریگێز لە تەمەنی تەنیا 14 ساڵیدا لە ریال سۆسیدادەوە پەیوەندی بە بارسێلۆناوە کرد. سەرەڕای ئەوەی بەشێکی زۆری وەرزی 2024-2025 بەهۆی پێکانەوە بەشداری نەکرد، بەڵام بە گەڕانەوەیەکی بەهێز دەستیپێکردەوە. ئەو لە 10 یارییدا بۆ تیپی لاوان، سێ گۆڵی تۆمارکردووە و چەندین ئەسیستی هەیە.
لەگەڵ رۆدریگێزدا، یاریزانانی ئەکادیمیای هاوڕێی، لاندری فارێ و نوح دەروێش، ئەم هەفتەیە لەگەڵ تیپی یەکەم راهێنانیان ئەنجامداوە و لەوانەیە ئەوانیش بەشداربن لە یارییەکەدا.
بارسێلۆنا دوای رووبەڕووبوونەوەی ڤایادۆلید، گەشت دەکات بۆ میلانۆ بۆ ئەنجامدانی یاریی گەڕانەوەی قۆناخی پێشکۆتایی چامپیۆنزلیگ بەرامبەر ئینتەرمیلان لە شەشی ئەم مانگە، کە یەکێکە لە گرنگترین یارییەکانی ئەم وەرزەیان.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ