هەڵەیەک روویدا! دووبارە هەوڵبدە
رووداو دیجیتاڵ
پلانی گواستنەوەی یاریی نێوان ڤیاریال و بارسێلۆنا لە لالیگادا لە ئیسپانیاوە بۆ ویلایەتە یەکگرتووەکانی ئەمریکا، یانەی ریال مەدریدی تووڕە کردووە و بە تووندی دژی دەوەستێتەوە و بە "پێشهاتێکی قبوڵنەکراو" ناوی دەبات.
فیدراسیۆنی تۆپی پێی ئیسپانیا رەزامەندیی سەرەتایی لەسەر پێشنیازەکە داوە کە یارییەکە لە یاریگای سیرامیکاوە بگوازرێتەوە بۆ یاریگای هارد رۆک لە مەیامی، بەڵام چاوەڕێی رەزامەندیی کۆتایی فیفا و یوفا دەکات.
یانەی ریال مەدرید لە راگەیێنراوێکدا هۆشداریی تووندی داوە کە ئەم هەنگاوە "هاوسەنگیی رکابەری تێکدەدات و سوودێکی نادادپەروەرانە بە رکابەرەکانی دەبەخشێت".
ریال مەدرید دەڵێت ئەم کارە زیان بە دەستپاکی و شەرعیەتی خولەکە دەگەیەنێت و بە فەرمی داوای لە فیفا و یوفا کردووە رێگری لە جێبەجێکردنی پلانەکە بکەن.
فێرناندۆ رۆیگ، سەرۆکی یانەی ڤیاریال، لەبارەی ئەو پێشنیازەوە پشتگیری لە پلانەکە دەکات و پێیوایە دەرفەتێکی گرنگە بۆ "فراوانکردنی براندی تۆپی پێی ئیسپانیا و بەدەستهێنانی داهاتی زیاتر".
هاوکات کۆمەڵەی هاندەرانی ئیسپانیاش (FASFE) لەگەڵ هاندەرانی بارسێلۆنا و ڤیاریال دژایەتیی خۆیان راگەیاندووە و هەڕەشەی گرتنەبەری رێکاری یاسایی دەکەن ئەگەر یارییەکە لە دەرەوەی ئیسپانیا ئەنجامبدرێت.
پێشتر دووجار هەوڵدراوە، بەشێکی یارییەکانی لالیگای ئیسپانیا لە ئەمریکا بکرێن، جارێکیان لە 2019 بڕیاربوو یاریی بارسێلۆنا و جیرۆنا لە مەیامی بکرێت، بەڵام هەوڵەکە شکستیهێنا، وەرزی رابردووش کار بۆ ئەوە دەکرا، یاریی بارسێلۆنا و ئاتلێتیکۆ مەدرید لە ئەمریکا بەڕێوەبچێت، بەڵام ئەوەش نەکرا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ