رووداو دیجیتاڵ
یانەی بارسێلۆنا لەبەردەم هەلێکی گەورەدایە بۆ یەکلاکردنەوەی نازناوی ئەم وەرزەی خولی ئیسپانیا، کاتێک بەرامبەر یانەی ئیسپانیۆل یارییدەکات.
لە درێژەی یارییەکانی گەڕی 34ـی لالیگا، ئەمشەو کاژێر 22:00 یانەی بارسێلۆنا لە دەرەوەی یاریگەی خۆی و لە دێربیی کەتەلۆنیادا دەبێتە میوانی یانەی ئیسپانیۆلی رکابەری، بارسا بۆ بردنەوەی نازناوەکە پێویستی بەبردنەوەیە و ئیسپانیۆلیش بۆ هەنگاونان بەرەو پاراستنی مانەوەی لە لالیگادا پێویستی بەبردنەوەیە.
یارییەکە بۆ هەردوولا گرنگییەکی زۆری هەیە، ئیسپانیۆل نایەوێت لە یاریگەی خۆیدا بدۆڕێت و زیاتر لە دابەزین بۆ خولی پلە یەک نزیکببێتەوە.
چاڤی هێرناندێز پلانەکانی خۆی بەهێزەوە دەباتە یاریگەی پاوەر 8 بۆ بەدەستهێنانی نازناوی لالیگا، چونکە بەبردنەوەی یارییەکە راستەوخۆ بارسا نازناوەکە یەکلادەکاتەوە و دەبێتە پاڵەوان.
بارسێلۆنا پێشەنگی ریزبەندی لالیگایە و 82 خاڵی هەیە، ئەگەر یارییەکەی ئەمڕۆ بباتە بۆ جاری 27ـەم لە مێژوویدا دەبێتە پاڵەوان، ئیسپانیۆل لە پلەی پێشکۆتایی ریزبەندی خولەکە خاوەنی 31 خاڵە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ