رووداو دیجیتاڵ
تاوەکو ئێستا زیاتر لە 365 هەزار واژۆ لەسەر ئینتەرنێت کۆکراونەتەوە بۆ پشتیوانیکردن لە پڕۆژەیاسای پاراستنی کورد تاوەکو کۆنگرێسی ئەمریکا پەسندی بکات.
پڕۆژەیاساکە لە لایەن هەردوو سیناتۆر لیندزی گراهامی کۆماری و ریچارد بلومێنتالی دیموکرات پێشنیاز کراوە.
بەگوێرەی پڕۆژە یاساکە، ئەگەر هێزەکانی سووریا هێرش بکەنە سەر کورد و هەسەدە، ئەوا دەبێت ئەمریکا سزا بەسەر سەرۆککۆمار، وەزیرەکان، بانکی ناوەندی و کۆمپانیا حکومییەکاندا بسەپێنێت.
لەسەر ماڵپەڕی change.org هەڵمەتێکی واژۆکۆکردنەوە راگەیێندراوە بۆ ئەوەی خەڵک بچێت و پشتیوانیی خۆی بۆ پڕۆژە یاساکە دەرببڕێت.
خەڵک دەتوانێت بە ئاسانی دەنگ بدات.
واژۆکار تەنیا ناوی خۆی و ئیمەیڵەکەی دەنووسێت. دواتر پەنجە بە دوگمە زەردەکەدا دەکات.
ئەم هەڵمەتە لە لایەن جیهان بریفکی، راوێژکاری کۆنفدراسیۆنی رەوەندی کوردستانی لە ئەمریکا و کەنەدا راگەیێندراوە.
د. محەممەد ئیحسان، مامۆستای کۆلێژی جەنگ لە زانکۆی لەندەن و شرۆڤەکاری سیاسی، ئەمڕۆ دووشەممە بە تۆڕی میدیایی رووداوی راگەیاند: "تاوەکو واژۆی زیاتر کۆبکرێتەوە گرنگیی پڕۆژە یاساکە زیاتر دەبێت، بۆ ئەوەی بزانرێت چەند کەس پێشوازی لەو پڕۆژە یاسایە دەکات".
محەممەد ئیحسان گوتی: "نابێت رێککەوتنی نێوان دیمەشق و بەڕێوەبەرایەتیی خۆسەر خەڵک سارد بکاتەوە لە واژۆکردن، بەڵکو دەبێ هەڵمەتەکە بەردەوام بێت، بۆ ئەوەی هەموو جیهان بزانێ هێشتا کورد لە مەترسیدایە".
ئەو شرۆڤەکارە ئاماژەی بە رێکارەکانی جێبەجێکردنی یاساکە کرد و گوتی: "سەرەتا دەبێت کۆنگرێس دەنگی لەسەر بدات، پاشان دەبرێتە ئەنجوومەنی پیران و لەوێوە ئاراستەی سەرۆکی ئەمریکا دەکرێت".
بە گوتەی د. محەممەد ئیحسان، دۆناڵد ترەمپ، سەرۆکی ئەمریکا ئەگەر پڕۆژەیاساکە واژۆ نەکات نابێتە یاسا. گوتیشی: "واژۆشی نەکات ئاساییە، چونکە دەزانێت لە کۆمەڵگەی نێودەوڵەتیدا ئەمریکا چی دڵەڕاوکێیەکی دروستکردووە و زیاتر ئاگاداری دۆخەکە دەبێ".
د. محەممەد ئیحسان ئاشکرای کرد، لە ئیسرائیل و بەریتانیاش هەڵمەتی هاوشێوە بۆ پاراستنی کورد هەیە، پێدەچێ لە فەڕەنساش هەبێت.
پڕۆژەیاسای پاراستنی کورد تاوەکو ئەمڕۆ زیاتر لە 365 هەزار واژۆی بۆ کۆکراوەتەوە
پاراستنی هەسەدە وەک ئامانجێکی نیشتمانی
لە دەقی پڕۆژەیاساکەدا هاتووە کە "هێزەکانی سووریای دیموکرات (هەسەدە)" هاوبەشێکی سەرەکین لە تێکشکاندنی داعش و پاراستنی ئاسایشی ناوچەکە. ئاماژە بەوەش کراوە، هەر هەنگاوێکی حکومەتی سووریا یان هەر وڵاتێکی ناوچەکە بۆ لاوازکردنی هێزە کوردییەکان، بە "دژایەتیکردنی ئاسایشی نیشتمانیی ئەمریکا" هەژمار دەکرێت.
سزاکان کێ دەگرێتەوە؟
پڕۆژەیاساکە داوا دەکات، لە ئەگەری هێرشکردنە سەر کورد، سزای دەستبەجێ بەسەر بەرپرسانی باڵای سووریادا بسەپێنرێت.
سزاکە کێ دەگرێتەوە؟
• سەرۆککۆماری سووریا.
• تەواوی وەزیرەکانی کابینەی حکومەت (بەتایبەت بەرگری، دارایی، دەرەوە و وزە).
• پارێزگاری بانکی ناوەندی و سەرکردە سەربازییەکان.
•بەڕێوەبەری کۆمپانیا حکومییەکان.
سزا دەخرێتە سەر هەر کەس و لایەنێکی بیانی کە هاوکاریی دارایی، مادی یان تەکنەلۆژی پێشكێش بە حکومەتی سووریا بکات، یان تێوەگلابێت لە پێشێلکردنی مافەکانی مرۆڤ.
کەرتی دارایی و بانکی ناوەندی
پڕۆژەیاساکە سزا دەخاتە سەر ژێرخانی دارایی سووریا و بانکی ناوەندی و هەموو ئەو بانکە بیانییانەی مامەڵەی لەگەڵ دەکەن. هەروەها رێگری دەکات لە هەر جۆرە وەبەرهێنانێکی نوێی ئەمریکی لە سووریا.
رێگری لە لابردنی ناوی سووریا لە لیستی تیرۆر
تایبەتمەندییەکی دیکەی ئەم پڕۆژەیاسایە ئەوەیە، ئەگەر سەرۆکی ئەمریکا بیەوێت ناوی سووریا لە لیستی دەوڵەتانی پشتگیریکاری تیرۆر لابدات، دەبێت 90 رۆژ پێشوەخت کۆنگرێس ئاگادار بکاتەوە. کۆنگرێسیش دەتوانێت بە دەنگی سێ لەسەر پێنجی سیناتۆرەکان، ئەو بڕیارەی سەرۆک رەتبکاتەوە.
هەڵوێست بەرامبەر دەستەی تەحریری شام (هەتەشە)
پڕۆژەیاساکە داوا لە وەزیری دەرەوەی ئەمریکا دەکات، جارێکی دیکە "دەستەی تەحریری شام" (بەرەی نوسرەی پێشوو) وەک رێکخراوێکی تیرۆریستیی بیانی پۆڵێن بکات.
مەرجی هەڵپەساردنی سزاکان
سەرۆکی ئەمریکا تەنیا لەو کاتەدا دەتوانێت سزاکان هەڵپەسێرێت کە سووریا هەموو هێرشەکانی بۆ سەر هەسەدە رابگرێت. بەڵام ئەگەر هێرشەکان دەستیانپێکردەوە، سزاکان راستەوخۆ کارا دەبنەوە. ئەم یاسایە ئەگەر پەسند بکرێت، بۆ ماوەی 5 ساڵ کارا دەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ