جیهان
کۆمەڵێک خەڵک لەکاتی گەڕان بەدوای قوربانییان لەژێر داروپەردووی ماڵێکی رووخاودا بەهۆی بوومەلەرزەکە، وێنە: AFP
رووداو دیجیتاڵ
ژمارەی ئەو کەسانەی لە ئەنجامی بوومەلەرزەکەی ئەفغانستان گیانیان لەدەستداوە بۆ زیاتر لە دوو هەزار کەس بەرزبووەوە.
عەبدولواحید رەیان، گوتەبێژی وەزارەتی زانیاری و کولتووری ئەفغانستان ئەمڕۆ (یەکشەممە، 8-10-2023) رایگەیاند، لە ئەنجامی بوومەلەرزەکەی رۆژی شەممە و پاشلەرزەکانی، زیاتر لە دوو هەزار کەس گیانیان لەدەستداوە.
عەبدولواحید رەیان ئاماژەی بەوەشکرد، لە ئەنجامی بوومەلەرزەکەدا 6 گوند وێران بوون و سەتان هاووڵاتیش کەوتوونەتە ژێر داروپەردووی خانووە رووخاوەکانەوە.
هاوکات سوهەیل شاهین، گوتەبێژی تاڵیبان کە لە قەتەر دادەنیشێت، بە میدیای عەرەبی راگەیاند، بوومەلەرزەکە زیانی گەورەی هەبووە و تاوەکو ئێستاش ژمارەیەکی زۆر کەس بێسەروشوێنن.
سوهەیل شاهین ئاماژەی بەوەش کرد، دۆخەکە خراپە و هاووڵاتییانی ئەو ناوچانەی بوومەلەرزەکە لێی داون، پێویستییەکی زۆریان بە خێوەت، دەرمان و خواردن هەیە.
بوومەلەرزەکە کاژێر 9:30ـی بەیانی رۆژی شەممە 7-10-2023 بە دووری 40 کم لە باکووری رۆژئاوای شاری هیرات لە پارێزگای هیرات روویدا. دوای ئەوەش چەند پاشلەرزەیەک لەو پارێزگایە و پارێزگاکانی بادغیس و فەرا روویاندا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ