دۆلار و روپیەی پاکستانی. وێنە: Reuters
رووداو دیجیتاڵ
هەزاران کۆنتێنەری هاوردەکارانی کاراچیی پایتەختی پاکستان لە بەندەری کاراچی گیریانخواردووە و هاوردەکاران دژی نەبردنە ژوورەوەی کاڵاکانیان گردبوونەوە. بەهۆی کەمبوونەوەی دۆلارەوە، بانکەکانی ئەو وڵاتە ناتوانن حەواڵە بۆ هاوردەکاران بکەن؛ هاوردەکارانیش دەڵێن، پێداویستیی کەم لە کۆگاکان ماوە و هۆشداری دەدەن.
عەبدولڕەئوف، هاوردەکاری دانەوێڵە دەڵێت، "تەنیا بەشی 25 رۆژ دانەوێڵە لە کۆگاکان ماوە؛ ئەگەر دەستبەجێ دۆلارمان پێنەدرێت، قەیرانێکی دژواری دانەوێڵە دروست دەبێت."
سەرۆکی کۆمەڵەی کۆمپانیاکانی ئاڵوگۆڕی پاکستان دەڵێت، مانگانە لە رێگەی بازرگانیی فەرمی و نافەرمییەوە دوو ملیار دۆلار لە پاکستانەوە بە قاچاخ دەبرێتە ئەفغانستان، ئەوەش یەکێکە لە هۆکارەکانی کەمبوونەوەی دۆلار.
لە سێ مانگدا، رووپییەی پاکستانی نزیکەی 5%ی بەهاکەی بەرامبەر دۆلار لەدەستداوە، بەو هۆیەشەوە نرخی خۆراک 35.5% بەرزبووەتەوە.
شەهمیر، هاووڵاتیی پاکستانی دەڵێت، "لە کاتێکی وەکو ئێستادا، پیاوێکی ئاسایی ناتوانێت شیر، شەکر یان هەر پێداویستییەکی دیکە بکڕێت. ئەمانە هەموو لە سەروو توانای کڕینی کەسی ئاساییەوەن."
یەدەگی دراوی بیانیی پاکستان تەنیا شەش ملیار دۆلاری هەیە، ئەوەش بەشی هاوردەی کاڵای تەنیا سێ هەفتە دەکات؛ کۆی قەرزەکانیشی گەیشتوونەتە 274 ملیار دۆلار کە دەکاتە 90%ی کۆی بەرهەمی نێوخۆیی وڵاتەکە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ