جیهان
وێنەیەکی دۆناڵد ترەمپ لەسەر شەقامەکانی تەل ئەڤیڤ کە لێی نووسراوە: سەرۆک ترەمپ بەڵێن دەدات و جێبەجێی دەکات
رووداو دیجیتاڵ
وەزیری دەرەوەی ئەمریکا و سەرۆکوەزیرانی پاکستان بە تەلەفۆن قسەیان کرد و تێیدا باسیان لە برەودان بە "ئاشتییەکی بەردەوام لەنێوان ئیسرائیل و ئێران" کرد.
وەزارەتی دەرەوەی ئەمریکا راگەیێندراوێکی لەبارەی پەیوەندییە تەلەفۆنییەکەی نێوان مارکۆ روبیۆ، وەزیری دەرەوەی ئەمریکا و شەهباز شەریف، سەرۆکوەزیرانی پاکستان بڵاوکردەوە.
پەیوەندییەکە دوای ئەوە دێت کە دۆناڵد ترەمپ، سەرۆکی ئەمریکا، لە سەرەتای ئەم هەفتەیەدا ئاگربەستێکی لەنێوان ئیسرائیل، هاوپەیمانیی ئەمریکا و ئێرانی رکابەری راگەیاند و جەنگە 12 رۆژییەکەی وەستاند.
هەفتەی رابردوو، ترەمپ لە کۆشکی سپی لەگەڵ عاسم مونیر، سوپاسالاری پاکستان کۆبووەوە و باسی ئێرانیان کرد. ترەمپ رایگەیاندبوو پاکستان باشتر لە زۆربەی وڵاتانی دیکە ئێران دەناسێت.
وەزارەتی دەرەوەی ئەمریکا لە راگەیێندراوەکەیدا کە شەوی پێنجشەممە بڵاویکردووەتەوە، دەڵێت: "هەردوو سەرکردە دانیان بە گرنگیی کارکردنی پێکەوەیی بۆ برەودان بە ئاشتییەکی بەردەوام لەنێوان ئیسرائیل و ئێراندا نا". هەروەها ئاماژە بەوەش دەکات: "روبیۆ جەختی کردەوە کە ئێران هەرگیز نابێت چەکی ئەتۆمی پەرەپێبدات یان بەدەستیبهێنێت".
ئەمریکا لە کۆتایی هەفتەی رابردوودا هێرشی کردە سەر دامەزراوە ئەتۆمییەکانی ئێران، ئێرانیش رۆژی دووشەممە وەک تۆڵەسەندنەوە هێرشی کردە سەر بنکەیەکی ئەمریکا لە قەتەر، ئەمەش پێش ئەوەی ترەمپ ئاگربەستی نێوان ئیسرائیل و ئێران رابگەیێنێت.
پاکستان سەرکۆنەی هێرشەکانی ئیسرائیل و ئەمریکای بۆ سەر ئێران کرد، ئەمەش لە کاتێکدایە لە سەرەتای ئەم مانگەدا رایگەیاندبوو ترەمپ بۆ وەرگرتنی خەڵاتی نۆبڵی ئاشتی بەربژێر دەکات، بەهۆی رۆڵی لە کۆتاییهێنان بە شەڕێکی چوار رۆژەی نێوان هیندستان و پاکستان لە مانگی رابردوودا.
بەشێک لە باڵیۆزخانەی پاکستان لە واشنتن نوێنەرایەتیی بەرژەوەندییەکانی ئێران لە ئەمریکا دەکات، چونکە تاران پەیوەندیی دیپلۆماسی لەگەڵ واشنتندا نییە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ