رووداو دیجیتاڵ
نوێنەری حکومەتی هەرێمی کوردستان لە ئیسپانیا دەڵێت، سەردانی پارێزگاری شاری گرنیکای لە ئیسپانیا کردووە و بڕیارە شارەکە و شاری هەڵەبجە ببنە دەستەخوشک.
دارەوان حاجی حامید، نوێنەری حکومەتی هەرێمی کوردستان لە ئیسپانیا، ئەمڕۆ شەممە بە تۆڕی میدیایی رووداوی گوت، "بۆ تەواوکردنی کارەکانی بەدەستەخوشکبوونی هەڵەبجە و شاری گرنیکا، دوێنێ سەردانی ماریا گۆرۆنیۆ، پارێزگاری گرنیکام کرد و کۆبووینەوە."
نوێنەری حکومەتی هەرێمی کوردستان لە ئیسپانیا دەڵێت، لە کۆبوونەوەکەدا پارێزگاری گرنیکا گوتوویەتی، "دوای هەڵسەنگاندن وردی ئەندامانی ئەنجوومەنمان، بڕیارمانداوە کە لەگەڵتان کاربکەین تاوەکو هەردوو شار (هەڵەبجە و گرنیکا) ببنە دەستەخوشکی یەکدی."
دارەوان حاجی حامید گوتیشی، "بۆ تەواوکردنی کارەکان بڕیارە بۆ ساڵیادی کیمیابارانی هەڵەبجە، پارێزگاری گرنیکا سەردانی هەرێمی کوردستان بکات و لەوێش نوخشە ناسیح، پارێزگاری هەڵەبجە بانگهێشتی ئیسپانیا بکات، بۆئەوەی لە ساڵیادی بۆردوومانی شاری گرنیکا لە 26-04-2026 رێککەوتنی دەستەخوشکی واژۆ بکەن."
هەروەها ئاماژەی بە دەستەخوشکبوون و گرنگییەکەی بۆ هەڵەبجە کرد و گوتی، "دوای رێککەوتن کاری هاوبەش دەستپێدەکات و لە بواری کۆمپانیاکان، بازرگانی، وەرزشی، گەشتیاری، کولتووری و تەنانەت هەلی کاریش هاوئاهەنگی یەکتر دەکەن و هەڵەبجە دەتوانێت سوودی لێوەربگرێت."
نوێنەری حکومەتی هەرێمی کوردستان دەڵێت، "ئەگەر هەردوو شار پابەندی رێککەوتنی دەستەخووشکی ببن، بێگومان تەنیا رێککەوتنی ناو نابێت و لە هەموو رووەکانەوە سوود بە هەردوو شارەکە دەگەیێنێت."
دارەوان حاجی حامید ئاماژەی بەوەش کرد، داوایان کردووە وەکو شارێکی رەمزی قوربانیدان، لەو شارەی ئیسپانیا پارکێک بەناوی هەڵەبجەوە بکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ