رووداو دیجیتاڵ
سوپای ئەمریکا هێرشی کردە سەر چەند پێگەیەکی داعش لە سۆماڵ و ژمارەیەک چەکدار کوژران و بریندار بوون.
فەرماندەیی هێزەکانی ئەمریکا تایبەت بە ئەفریقا- ئەفریکۆم رایگەیاند، "رۆژی شەممە، هێزی ئاسمانیی ئەمریکا هێرشی کردە سەر چەند بنکە و پێگەیەکی چەکدارانی دەوڵەتی ئیسلامی (داعش) لە سۆماڵ و ژمارەیەک چەکداریش کوژران".
هێرشەکان ناوچەی "پۆرتلاند"ـی باکووری رۆژهەڵاتی سۆماڵیان گرتووەتەوە و ژمارەیەک چەکداری داعش کوژراون و برینداربوون.
لە شوباتی ئەمساڵ و لە دوای دەستبەکاربوونی ترەمپ؛ ئەفریکۆم چەند هێرشێکی ئاسمانی کردە چەند پێگەیەکی داعش لە سۆماڵ و ژمارەیەک چەکدار لە نێویاندا سەرکردەیەکی دیاری داعش کوژران.
لە 1991ـوە شەڕی نێوخۆیی لە سۆماڵ هەڵگیرساوە و بەردەوام حکومەت رووبەڕووی هێرش و هەڕەشەی گرووپە چەکدارە ئیسلامییەکان بووەتەوە.
لە 2006 دا " بزووتنەوەی شەباب"ـی جیهادی راگەیێندرا و لە 2012 بەیعەتی دایە رێکخراوی قاعیدە.
لە پێنج ساڵی رابردوودا و بە دیاریکراوی لە ناوچەی پۆرتلاندی سۆماڵ، رێکخراوی داعش گەشەی کردووە و بە گوێرەی زانیارییە هەواڵگرییەکان، ژمارەی لایەنگرانی لە زیادبووندان.
فەرماندەیی ئەفریکۆم رایگەیاند، "دوا هێرشی هێزە ئاسمانییەکانیان بۆسەر پێگەکانی داعش بە هاوئاهەنگی لەگەڵ حکومەتی سۆماڵ کراوە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ