رێوڕەسمی دابەشکردنی خەڵاتەکانی قەڵەمی هەژار
رووداو دیجیتاڵ
لە رۆژانی 28 و 29ی ئایار، رێوڕەسمی دابەشکردنی خەڵاتی 'قەڵەمی هەژار' بەڕێوەچوو، تێیدا چەند نووسەری کورد لە پای نووسین و خزمەتیان لە بواری وێژەی کوردیدا خەڵاتکران.
ناوەندی توێژینەوەی کوردستانناسیی زانکۆی کوردستان لە شاری سنەی رۆژهەڵاتی کوردستان، یەکەم خولی خەڵاتی 'قەڵەمی هەژار'ی بۆ نووسین و ئەدەبی کوردی رێکخست.
قەڵەمی هەژار
خەڵاتی قەڵەمی هەژار تایبەتە بە نووسین، داڕشتن، وەرگێڕان و لێکۆڵینەوە لەم بوارانە:
- ئەدەبی کوردی
رۆمان، کۆمەڵە چیرۆک، ئەدەبی منداڵان و مێرمنداڵان، شانۆنامە و شیعر
- توێژینەوەی زمانناسی و ئەدەبی
فۆلکلۆر، فەرهەنگ نووسی، توێژینەوەی زمانناسی (تیۆری، پراکتیکی، زاراوەناسی و فرەچەشنی زمان)، توێژینەوەی بەراوردکارانەی ئەدەبی/زمانناسی بە جەختکردنەوە لەسەر کارلێکی زمانی کوردی و فارسی و زمانەکانی دیکەی ئێرانی و غەیرە ئێرانی.
- بوارە هاوبەشەکان
ئایینی و عیرفانی، مێژوویی و کولتووری و کۆمەڵایەتی، هونەری، یاسایی و سیاسی و ئابووری، پەرەوەردە و رەگەز و میدیا.
بەپێی راگەیێندراوی رێوڕەسمەکە، ئەو بەرهەمانەی کە لە ئاستێکی باش و شیاودا بوون، خەڵاتکراون.
براوەی خەڵاتەکان
- رۆمان: جەبار جەمال غەریب
- مێژوو: ئیسماعیل شەمس
- فەلسەفە: محەممەد کەمال
- رەخنەی ئەدەبی و شێوازناسی: عەبدولڕەحمان ئاداک
- فەرهەنگنووسی: سەلاح پایانیانی
- کۆمەڵناسی: عەلی رەحمەتی
رێزگرتن پێشکێشی ئەم کەسایەتییانە کرا:
- توێژینەوەی ئەدەبی
شنەی وای شەماڵ، عەلیڕەزا خانی و بێهناز دڵشاد
- ساخکردنەوەی دەق
گنجینه متون ادبی زاگرس ـ سەید ئارمان حسێنی
- فۆلکلۆر بە هاوبەشی
راسی ناوچەی لەیلاخ ـ ئیبراھیم ئەحمەدی
افسانههای دیار ما ـ کوروش ئەمینی
- سینەما
هویت فرهنگی و سینمای کرد ـ خوسرەو سینا
- لێکدانەوەی سیاسی و کۆمەڵایەتی
حەوتەوانە ـ سەلاحەدین خەدیو
- شیعر
زامستان و پشکۆی هاوار ـ رەحیم لوقمانی
دەسنوێژی شیعر - سەعید نەجاڕی (ئاسۆ)
بە هاوبەشی
شیعر
مینا ماڵ ـ عەلیڕەزا سپاهی لاتین
سوێند به فوڕات ـ یوونس رەزایی
بە هاوبەشی
شیعر
ئاڤراندن ـ عەلی ئۆلفەتی
شێعریۆوەنا پەڕ جە شاری ـ رەئووف مەحموودپوور
بە هاوبەشی
شیعر
چەمێ بارانێ ـ بەرکەن بەرە (خەڵاتی سەربەخۆ)
- مێژووی هونەر
تاریخ هنر کردستان ـ میکایل رەحمانی
- فەرهەنگنووسی
فەرهەنگی رەوەکناسیی کوردستان ـ ئیرەج مورادی
- ئایینی و عیرفانی
راڤەی مەسنەویی مەولەوی ـ فەخرەدین ئامێدیان
- مێژوو
کۆی بەرهەمەکان ـ دکتور کەیوان ئازاد ئەنوەر
- رۆمان
سەردەمی تەنیاییەکان ـ ئەسعەد زۆهرایی
- شرۆڤەی رۆمان
بنەماگەلی ئەدەبی چیرۆک ـ زەکەریا بزدوودە
- وەرگێڕان
شهر نوازندگان سفید ـ رەزا کەریم مۆجاوێر
کۆی بەرهەمی وەرگێڕدراو ـ عەبدوڵڵا ئەمینی
دیرۆکا وێژەیا کوردی (حەوت بەرگ) ـ ئیبراھیم شادمان، سەرگوڵ ئارەش، میراد میلان، رۆنیا چالی و بەسام مستەفا
- وەرگێڕانی منداڵان
نەقڵەکانی من و بابم ـ زاهید ئارمی
ماسی کۆلکەزێڕینە ـ لەیلا ساڵحی
- ئەدەبی منداڵان
کۆی بەرهەمەکان ـ شیلان گەیلانی
کۆی بەرهەمەکان ـ سەمیرا زەمانی مونفەرد
کۆی بەرهەمەکان ـ یەحیا عەلەوی فەرد
کۆی بەرهەمەکان ـ فەردین راژین
جەبار جەمال غەریب: فێستیڤاڵەکە کرانەوەیەکی زۆر گەورە بوو بە رووی کورد دا
نووسەری دیاری کورد، جەبار جەمال غەریب، براوەی خەڵاتی رۆمان بوو بۆ رۆمانی (کەوتنی ئاسمانەکان). ئەو لەبارەی یەکەمین رێوڕەسمی 'قەڵەمی هەژار' قسەی بۆ رووداو کرد و گوتی: ئەو فێستیڤاڵە گۆڕانکارییەکی زۆر گەورە بوو لە بواری سیاسی و کۆمەڵایەتیی خەڵکی سنە.
جەبار جەمال غەریب گوتی: ئەو ئازادی و پێشڤەچوونەی لەوێ هەیە، "حساباتێکی زۆری بۆ کراوە، لە رێوڕەسمەکەدا سەلاحەدین ئاشتی، گوتارێکی زۆر جوانی پێشکێشکرد و تێیدا گوتی 'من روو لە دەسەڵات دەکەم و دەڵێم ئەگەر ئەو کرانەوەتان فێڵە و دەتانەوێ لە رووی دیپلۆماسییەوە هەڵمان بخەڵەتێنن، ئەوا کورد لەبیری ناچێت و رێگە و زەبری دیکەی هەیە بەرامبەر داگیرکەران، ئەگەر فێڵیش نییە، تکایە زمانی کوردی بکەنە زمانی رەسمی و با لە هەموو قوتابخانەکان بخوێندرێ."
ئەو نووسەرە کوردە دەڵێت: "قەڵەمی هەژار کرانەیەوەیەکی زۆر گەورە بوو بە رووی کورد و مافە بنەڕەتییەکانیدا."
941 بەرهەم بۆ 'قەڵەمی هەژار' نێردرابوون
د. یادگار کەریمی، سکرتێری رێوڕەسمی دابەشکردنی خەڵاتی (قەڵەمی هەژار) رایگەیاند، 941 بەرهەم بۆ سکرتاریەتی رێوڕەسمی دابەشکردنی خەڵاتەکان نێردرابوون و لیژنەی دادوەران 6 بەرهەمیان هەڵبژارد بۆ پێدانی خەڵاتی تایبەت و 32 بەرهەمیش بۆ رێزلێنان.
84 کەس ئەندامی لیژنەی دادوەران بوون لە نێوخۆ و دەرەوەی رۆژهەڵاتی کوردستان.
د. نەجمەدین جەباری، سکرتێری زانستیی رێوڕەسمی دابەشکردنی خەڵاتی قەڵەمی هەژاریش رایگەیاند، زۆرترین بەرهەمی بۆیان نێردراوە، وەرگێڕان بووە و 74٪ی ئەوانەی بەرهەمیان ناردووە پیاو و 36٪یشیان ژنن.
یەکەم جارە خەڵاتی قەڵەمی هەژار دابەش دەکرێت و بە گوتەی بەڕێوەبەرانی رێوڕەسمەکە، گەورەترین خەڵاتی جیهانیی تایبەت بە کتێبی کوردییە. لە رێوڕەسمی دابەشکردنی خەڵاتەکەدا، ژمارەیەک لە نووسەر و وەرگێڕانی هەر چوار پارچەی کوردستان و نووسەر و وەرگێڕانی کورد لە دیاسپۆرا بەشدار بوون.
یەکێک لە دیارترین کەسایەتیەکان کە ئامادەبوو، هونەرمەندی نێوداری کورد شەهرامی نازری بوو، کە چەند گۆرانییەکی کوردی پێشکێشکرد و دیارترینیان گۆرانیی "کوردستان گەر تۆ نەبی" بوو.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ