کوردستان
وەزیری پێشمەگەی حکومەتی هەرێمی کوردستان لەگەڵ بەرپرسی نووسینگەی هاریکاریی ئاسایش لە کۆنسووڵخانەی گشتیی ئەمریکا و شاندێکی یاوەری.
رووداو دیجیتاڵ
وەزیری پێشمەرگەی حکومەتی هەرێمی کوردستان پێشوازی لە بەرپرسی نووسینگەی هاریکاریی ئاسایش لە کۆنسووڵخانەی گشتیی ئەمریکا لە هەرێمی کوردستان کرد و رایگەیاند، "دڵنیابووینەوە هاوکاری ئەمریکا و هاوپەیمانان بۆ هێزی پێشمەرگە بەردەوام دەبێت."
شۆڕش ئیسماعیل و کۆڵۆنێڵ دێک پیلوێک ئەمڕۆ دووشەممە کۆبوونەوە. وەزارەتی پێشمەرگە دەڵێت، شۆڕش ئیسماعیل بە بۆنەی دەستبەکاربوونی، پیرۆزبایی لە کۆلۆنێل دێک پیلوێک کرد و هیوای "سەرکەوتن، بەردەوامی و هەماهەنگی زیاتری نێوان وەزارەتی پێشمەرگە و نووسینگەی هاریکاری ئاسایشی"، بۆ خواست.
بەگوێرەی راگەیێندراوەکە، لە کۆبوونەوەکە باس لە دوایین بەرەوپێشچوونەکانی پرۆسەی چاکسازی و بنیاتنانی دوو ناوچەی سەرکردایەتیی سەربازی و فیرقەکانی پیادە لە وەزارەتی پێشمەرگە کراوە. وەزیری پێشمەرگە لەوبارەوە رایگەیاند، "پرۆسەی چاکسازی بەردەوامە و هەوڵەکانمان بۆ سەرخستنی چاکسازی چڕترکردووەتەوە."
وەزارەتی پێشمەرگە دەڵێت، شۆڕش ئیسماعیل ستایشی پشتیوانیی بەردەوامی ئەمریکا و هاوپەیمانانی کرد بۆ وەزارەتەکە و گوتی، "هێزی پێشمەرگەی کوردستان لە قۆناخی گەشەسەندن و بەهێزبووندایە بۆ ئەمەش پێویستمان بە هاوکاری دۆستەکانمانە لە سەروو هەموویانەوە ئەمریکا، دڵنیابووینەوە ئەمریکا و هاوپەیمانان لە هاوکاری و پشتیوانی هێزی پێشمەرگەی کوردستان بەردەوام دەبن."
بەگوێرەی راگەیێندراوەکە، جەنەراڵ دێک پیلوێک بە وەزیری پێشمەرگەی راگەیاندووە، "بەردەوام هاوکاری وەزارەتی پێشمەرگە دەبین بۆ بنیاتنانی ژێرخانێکی سەربازیی نیشتمانی بەهێز و بە ئامانج گەیاندنی پرۆسەی چاکسازی."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ