لە دهۆک 26 هەزار ئاوارە تۆمارکراوە و زۆربەیان کارتی دەنگدانیان وەرگرتووەتەوە. وێنە: بڵند تاهیر- رووداو
رووداو دیجیتاڵ
بەڕێوەبەری نووسینگەی دهۆکی کۆمیسیۆنی هەڵبژاردنەکان دەڵێت، ئامادەکاری تەواو کراوە و لە 7ی مانگدا ئامێرەکان دەبەنە نێو وێستگە و بنکەکانی دەنگدان، 96٪ی ئەوانەی مافی دەنگدانیان هەیە کارتەکانیان وەرگرتووەتەوە.
خالید عەباس، بەڕێوەبەری نووسینگەی دهۆکی کۆمیسیۆنی باڵای سەربەخۆی هەڵبژاردنەکانی عێراق، لە بووڵتەنی کاژێر 13:00ی تۆڕی میدیایی رووداو رایگەیاند: "سەرجەم ئامادەکارییەکانیان بۆ بۆ هەڵبژاردن تەواو کردووە، "پێداویستیی لۆجیستی و ئامێرەکانمان بەدەست گەیشتوون و خولی راهێنانمان بۆ سەرجەم کارمەندەکان کردووە کە ژمارەیان نزیکەی 10 هەزار کەسە."
بەڕێوەبەری نووسینگەی دهۆکی کۆمیسیۆن راشیگەیاند: "لە 7ی مانگدا ئامێرەکان دەبەینە نێو وێستگە و بنکەکان، ئامادەکاری باش کراوە و رێژەیەکی باشیش لە کارتی دەنگدان دابەش کراون."
سەبارەت بە دۆخی بانگەشە خالید عەباس ئاماژەی بەوە کرد: "بانگەشە لە کەشێکی دیموکراسی بێ سەرپێچی بەڕێوەدەچێت، ئێمە وەکو کۆمیسیۆن هیچ سەرپێچییەکمان تۆمار نەکردووە، تەنیا 12 بەربژێرمان ئاگادارکردووەتەوە لەوەی پۆستەرەکانیان لە شوێنی هەڵە دانابوو، لایان ببەن."
دەشڵێت، "دوو سکاڵا لەلامان تۆمارکراون و لێکۆڵینەوەیان لێدەکەین، هەردووکی لەلایەنی لایەنێکی سیاسییەوە تۆمارکراوە و لەسەر دڕاندنی پۆستەرەکانیان بوو، کە ڤیدیۆ و وێنەیان وەکو بەڵگە ناردووە و ئێمەش سکاڵاکانمان ناردووەتە بەغدا بۆ یەکلایی کردنەوەیان."
لە دهۆک 779 هەزار کەس مافی دەنگدانیان هەیە، بەڕێوەبەری نووسینگەی دهۆکی کۆمیسیۆنی هەڵبژاردنەکان گوتی، "96٪ـی ئەو دەنگدەرانە کارتەکانیان وەرگرتووەتەوە، تەنیا نزیکەی 14 هەزار کارت ماون وەرنەگیراونەتەوە، رۆژانە پەیوەندییەکان پێوە دەکرێت و لەلایەن تیمی گەڕۆکەوە کارتەکانیان بۆ دەبرێتەوە."
لە هەڵبژاردنی رابردوودا، جگە لە کارتی دەنگدان، داوا دەکرا دەنگدەر بەڵگەنامەیەکی دیکەش لەگەڵ خۆی ببات تاوەکو بتوانێت دەنگ بدات، بەڵام ئەمجارە دەنگدەر تەنیا بە کارتی دەنگدان دەتوانێ دەنگ بدات، چونکە هەموو زانیارییەکانی کەسی دەنگدەری تێدایە.
لەبارەی دەنگدانی ئاوارەکان ئاماژەی بەوە کرد، گرنگییەکی زۆر بە پرسی ئاوارەکان دەدەن، "26 هەزار ئاوارەمان تۆمارکردووە، زۆربەی ئاوارەکان کارتەکانیان وەرگرتووەتەوە، تەنیا نزیکەی 200 کارت ماون وەرنەگیراونەتەوە، دەنگدانی ئەوانیش هاوشێوەی دەنگدانی تایبەت دەبێت لە 9ی مانگ."
رۆژی 9ـی 11ـی 2025 دەنگدانی تایبەت لە 809 بنکە و 4,501 وێستگە بەڕێوەدەچێت، رۆژی 11ـی 11ـی 2025 دەنگدانی گشتی لە 8,703 بنکە و 39,285 وێستگە بەڕێوەدەچێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ