رووداو دیجیتاڵ
ئێوارەی ئەمڕۆ هێڵی بۆریی گواستنەوەی گاز لەنێوان پارێزگاکانی سەلاحەدین- کەرکووک تەقیەوە و ئاگرێکی گەورەی لێکەوتەوە. بەشێوەیەکی کاتی رێگەی نێوان قەزای بێجی و کەرکووک داخراوە "بۆ سەلامەتی هاموشۆکاران و رێگریکردن لە دزەکردنی گاز، یاخود تەقینەوەی دیکە."
ئاگرەکە لە گوندی مورادییە لەنێوان ناحیەی ریاز و ناحیەی فەتحە لە سنووری پارێزگای سەلاحەدین کەوتەوە، کە دەکەوێتە نزیک فەتحە.
سەرچاوەیەک لە کۆمپانیای نەوتی باکوور بە تۆڕی میدیای رووداوی راگەیاند، ئەمە گازی کێڵگەی عوجێلی پێدەگوترێت، کە بۆ پاڵاوتن دەچێتە پاڵاوگەی کۆمپانیای گازی باکوور.
سەرچاوەکە گوتی، نزیکەی سێ مەتر بۆڕییەکە رزی بوو، تیمەکان سەرقاڵی چاککردنەوە و نۆژەنکردنەوەی بوون لەوکاتەدا بۆڕییەکە تەقیوەتەوە.
بەگوتەی سەرچاوەکە، هەر لە سەرەتاوە گازەکە لە سەرچاوەکەی گیراوەتەوە، ئەوەی ئێستا دەسووتێت تەنیا ئەو گازەیە کە لەنێو بۆڕییەکەدا ماوەتەوە. کۆمپانیای گازی باکوور دوو ئۆتۆمبێلی ئاگرکوێژنەوەیان ناردووە بۆ کۆنترۆڵکردنی ئاگرەکە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ