وردەکاریی تەقینەوەی ئۆتۆمبێلێک لە سلێمانی
رووداو دیجیتاڵ
کاژێر 11:30 رۆژی سێشەممە، لە گەڕەکی راپەڕینی سلێمانی لە نزیک یەکەیەکی نیشتەجێبوون ئۆتۆمبێلێک تەقییەوە، دووکەڵی تەقینەوەکە بەرزبووەوە و هاونیشتمانییان بەهۆی رووداوەکەوە شڵەژان و یەکێکیان دەڵێت: "دەنگی زۆر بەهێز بوو، هەمووانی راچڵەکاند."
چەند کاژێرێک دوای رووداوەکە دژەتیرۆری کوردستان چەند زانیارییەکی لەبارەی رووداوەکە بڵاوکردەوە و گوتی، کە ئەندامی تەڤگەری ئازادی و خەڵکی رۆژئاوای کوردستانن، بەڵام هاوسەرۆکی تەڤگەری ئازادی بۆ رووداو قسەی کرد و گوتی: "ئەندامی ئێمە نەبوون و هیچ پەیوەندیشیان بە ئێمە نییە."
لەبارەی رووداوەکەوە چەند شایەتحاڵێک ساتی تەقینەوەکەیان گێڕایەوە. یەکێک لەوان دەڵێت: "دەنگی تەقینەوەیەکی بەهێز هات، وامزانی لەنێو شوقەکانەوە بوو، بەس سەیرم کرد لە پشتمانەوە بوو، دوو کەسم بینی تێیدا. باش بوو ئێمە دوورکەوتینەوە و سەلامەت بووین. بەڵام ترساین."
هێزە ئەمنییەکان گەیشتنە شوێنی رووداوەکە و لێکۆڵینەوەیان دەستپێکرد. لە سەرەتادا دەزگەی ئاسایشی هەرێم بەبێ وردەکاری لەسەر هۆکار و چۆنێتی رووداوەکە، برینداربوونی شۆفێر و سەرنشینێکی پشتڕاست کردەوە و رایگەیاند: "بەهۆی تەقینەوەی ئۆتۆمبێلێک لەجۆری کیا سپۆرتاج رەنگی سپی، کە ئێستا هۆکاری تەقینەوەکەی نەزانراوە، بووە هۆی برینداربوونی دووکەس بەسەختی، کە یەکێکیان شۆفێری ئۆتۆمبێلێکە و ئەوەی دیکەیان سەرنشین بووە و لێکۆڵینەوە لە هۆکاری تەقینەوەکە بەردەوامە."
جگە لەو زانیارییانەی لە پەیجی فەرمیی دژەتیرۆری کوردستان لەبارەی ناسنامەی بریندارەکانەوە بڵاوکراوەتەوە کە دەڵێت: "بریندارەکان خەڵکی رۆژئاوای کوردستانن و ئەندامی تەڤگەری ئازادین." هیچ لایەنێکی دیکە لەبارەی ناسنامەیانەوە هیچی نەگوتووە، بەڵام بەگوتەی شایەتحاڵێک کە نەیویست بناسێندرێت، کاتێک بۆ بەهاناچوونی بریندارەکان رۆیشتوون، بینیویانە "هەردوو سەرنشین کە پیاوبوون بە زاراوەی کورمانجی هاوار و ناڵەیان کردووە."
بە گوتەی شایەتحاڵەکە یەکیان دەم و چاوی بە سەختی برینداربووە، بەڵام سەرنشینەکەی دیکەیان دەست و قاچی پەڕیبوو و خەڵک گەیاندوویانن بە نەخۆشخانە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ