رووداو دیجیتاڵ
بەڕێوەبەرایەتیی گشتیی گەشتوگوزاری هەڵەبجە دەڵێت، فێستیڤاڵی هەناری پارێزگاکە بووەتە بزوێنەرێکی گرنگی ئابووری و کۆمەڵایەتی بۆ ناوچەکە و هەرێمی کوردستان بە گشتی.
بەڕێوەبەرایەتییەکە، پاش سێ مانگ لە ئامادەکاریی چڕوپڕ، جەخت لەسەر ئەو کاریگەرییە گەورانە دەکاتەوە فێستیڤاڵەکە لەسەر ژیانی خەڵک و بووژانەوەی کەرتی گەشتوگوزار و بازرگانی جێی هێشتووە.
"ریکۆردێکی مێژوویی لە راکێشانی گەشتیار"
بەپێی ئامارە فەرمییەکان کە لەلایەن گەشتوگوزاری هەڵەبجەوە راگەیێندراون، فێستیڤاڵی ئەم ساڵ "سەرکەوتنێکی بێوێنەی لە راکێشانی گەشتیار و سەردانیکەر بەدەستهێنا. نزیکەی 419,700 گەشتیار و سەردانیکەر لە سێ رۆژدا روویان لە هەڵەبجە کرد".
"ئەم سەرکەوتنە دەریخست فێستیڤاڵی هەنار و پاییزی هەڵەبجە پێگەیەکی گرنگی لە نەخشەی گەشتیاریی هەرێمی کوردستان و عێراقدا داگیر کردووە". ئەمە وەک گەشتوگوزاری هەڵەبجە باسی دەکات.
"داهاتی بێوێنە و بووژانەوەی ئابووری"
لەڕووی ئابوورییەوە، فێستیڤاڵەکە داهاتێکی بەرچاوی تۆمارکرد؛ کۆی گشتیی فرۆشی هەنار و بەرهەمە خۆماڵییەکان گەیشتە زیاتر لە 1.7 ملیار دینار.
گەشتوگوزاری هەڵەبجە ئاماژە بەوە دەکات: "ئەم قەبارە بازرگانییە، بووژانەوەیەکی ئابووریی گەورەی بۆ جووتیاران، خاوەنکارە بچووکەکان و، سەرجەم ئەو کەسانەی لەم کایەیەدا کاریان دەکرد، فەراهەم کرد و وەک هاندەرێک مایەوە بۆ بەردەوامیدان بە بەرهەمهێنانی خۆماڵی".
یەکێک لە گرنگترین دەستکەوتەکانی فێستیڤاڵ، وەکو گەشتوگوزار باسی کردووە، رەخساندنی هەلی کار بوو بە شێوەیەکی راستەوخۆ و ناڕاستەوخۆ. زیاتر لە 700 جووتیار، پیشەوەر و، دەستڕەنگین لەڕێگەی 700 ستاند و کەپرەوە بەشدارییان کرد، کە ئەمەش هەلی کاری بۆ نزیکەی 2,100 کەس بەشێوەی راستەوخۆ و زیاتر لە 3,000 کەس بەشێوەی ناڕاستەوخۆ فەراهەم کرد.
بەڕێوەبەرایەتیی گەشتوگوزار ئەمەی بە "بەڵگەیەک لەسەر کاریگەریی فێستیڤاڵەکە لەسەر دروستکردنی دەرفەتی کار و پەرەپێدانی ئابووریی ناوچەکە" وەسف کرد.
فێستیڤاڵەکە سەرنجی ژمارەیەکی زۆر لە کەناڵەکانی راگەیاندن و میدیاکارانی ناوخۆیی و نێودەوڵەتی راکێشا، کە ئەمەش ناوبانگی هەناری هەڵەبجە و کولتووری دەوڵەمەندی ناوچەکەی بە جیهاندا بڵاوکردەوە. لە لایەنی ئاسایشەوە، سەرەڕای ئەو قەرەباڵخییە زۆرە، فێستیڤاڵی ئەمساڵ بەبێ هیچ رووداوێکی نەخوازراو کۆتایی هات، ئەمەش دەگەڕێتەوە بۆ پلانی ئەمنیی تۆکمە و هاوئاهەنگیی نێوان لایەنە پەیوەندیدارەکان.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ