هەڵەیەک روویدا! دووبارە هەوڵبدە
رووداو دیجیتاڵ
نووسینگەکانی خانووبەرە لە کەلار ئاگادار دەکرێنەوە کە هیچ مامەڵەیەک بە بەشی فراوانکردنی پڕۆژەی بان ستی - بامۆکەوە نەکەن. سەرۆکی لقی گەرمیانی سەندیکای کرێکارانیش دەڵێت: "چەند بەرپرسێک موڵکی کرێکاران دەفرۆشن."
لقی گەرمیانی سەندیکای کرێکاران سەرجەم نووسینگەکانی خانووبەرەی لە کەلار ئاگادار کردووەتەوە، کە مامەڵە بە فراوانبوونی پڕۆژەی بان ستی - بامۆکەوە نەکەن؛ "چونکە ئەو پڕۆژەیە موڵکی توێژی کرێکارانە و کۆمپانیا ناتوانێت مامەڵەی پێوە بکات."
رۆژی سێشەممە، 3ی 12ی 2024 عەدنان محەممەد مارف، سەرۆکی لقی گەرمیانی سەندیکای کرێکاران بە رووداوی گوت: "بە مەبەستی فراوانکردنی پڕۆژەی بان ستی، بە هاوبەشی لەگەڵ سەندیکای ئەندازیاران داوامان کرد زەوی بە ئەو کرێکار و ئەندازیارانە بدرێت کە سوودمەند نەبوون؛ نزیکەی 200 پارچە زەوی تەرخانکرا. بەڵام تاوەکو ئێستا دابەش نەکراون."
پڕۆژەی بان ستی – بامۆک، دەکەوێتە بەرزاییەکانی بەردەسوور لە شاری کەلار؛ سەرەتا 810 یەکە بەپێی رێکاری یاسایی و تیروپشک بەسەر کرێکار و ئەندازیاراندا دابەش کرا.
بە گوتەی سەرۆکی لقی گەرمیانی سەندیکای کرێکاران، پڕۆژە کۆنەکەی بان ستی هەندێ خزمەتگوزاری مابوو وەک قوتابخانە، دایەنگە و بنکەی ئاگرکوژێنەوە؛ داوایان کرد ئەم پڕۆژەیە نوێ بکرێتەوە. نووسراوێکیان بۆ ئیدارەی گەرمیان کرد. ئەوانیش رەزامەند بوون.
عەدنان محەممەد گوتی: "ئێستا هەندێک کۆمپانیا بە پشتیوانی هەندێک کەس پەیدا بوون و مامەڵە بەو زەوییانەوە دەکەن کە بڕیاردراوە بدرێتە کرێکاران و ئەندازیاران."
لقی گەرمیانی سەندیکای کرێکارانیش دەڵێت: "تێبینیمان کردووە هەندێک لە نووسینگەکانی خانووبەرە، زەوی بێت یان خانوو، پڕوپاگەندەی فرۆشتنی بۆ دەکەن؛ بۆیە هەر مامەڵەکردنێک تووشی رێکاری یاسایی دەبنەوە و ئەوەی مامەڵەی پێوە بکات، زەرەرمەند دەبێت."
پێشتر چەند جارێکی دیکە خەڵک و نووسینگەکانی ناوچەکە ئاگادار کراونەتەوە، نابێ مامەڵە بەو زەویانە بکەن.
هێمن محەممەد، خاوەن نووسینگەی ماردین لە کەلار بە رووداوی گوت: "کۆمپانیای ئایندەی بامۆک خۆی بنکەی فەرمییان هەیە و دەیفرۆشێتەوە. بە ئێمەیشی داوە وەک نووسینگە بۆیان بفرۆشینەوە و نووسینگانەیان لێ وەردەگرین."
ئەو خاوەن نووسینگەیە دەشڵێت، "زەوییەکان 200 مەترە، نرخی هەر زەوییەک لە نێوان 40 هەزار دۆلار بۆ 55 هەزار دۆلارە. خانووەکانیش هەر 200 مەترن؛ یەک نهۆم و دوو نهۆمی هەن. نرخی خانووی یەک نهۆمی بە 80 هەزار دۆلارە و دوو نهۆمیش بە 120 هەزار دۆلارە."
خاوەن نووسینگەی ماردین روونیکردەوە، ئەو یەکانە بە شێوازی کاش و قیستیش دەفرۆشرێن. هەیانە بە یەک دوو قۆناخ و بە شەش مانگ تەواو دەبێت؛ هەشیانە بە دوو ساڵ تەواو دەبێت. ئەو کەسەی بە کاشیش بکڕێت، نرخەکەی هەرزانترە.
عەدنان محەممەد مارف، سەرۆکی لقی گەرمیانی سەندیکای یەکێتیی کرێکاران گوتی: "چەند جارێک کۆبووینەوە و قسەمان لەسەر کردووە. ئێمە بەرگریی لە موڵکی خەڵک و کرێکار دەکەین. بە هیچ جۆرێک سازش ناکەین."
سەرۆکی لقی گەرمیانی سەندیکای یەکێتیی کرێکاران گوتیشی: "ئەو چەند بەرپرسە دەیانەوێت بە شێوەی بازرگانی بۆ خۆیان بیفرۆشن. خەڵک بە زەوی بیەوێت یان بیەوێت بۆی بکەنە خانوو، ئەو کۆمپانیایانە بۆی دروست دەکەن و پێی دەفرۆشن. هاوکات ئەو خانوو و زەوییانە تائێستا ماستەر پلانیان نییە؛ رێکاری یاسایی و ئیداریشی تەواو نەبووە. بەشێکیان کشتوکاڵین."
بە گوتەی عەدنان محەممەد مارف حکومەت لەسەر نووسراوی سەندیکای کرێکاران و ئەندازیاران بڕیاریداوە ئەمە بۆ توێژی کرێکاران تەرخان بکرێت، نەدراوە بە هیچ کۆمپانیایەک. هێشتا نرخ و رێکخستنی زەوی و خانووەکان دانەنراوە، ئەوان دەیفرۆشن. ئەگەر دەست هەڵنەگرن، بابەتەکە دەیگەیێنینە دادگە و خۆپێشاندانیش دەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ