رووداو دیجیتاڵ
بەڕێوەبەرایەتیی نەهێشتنی مادە هۆشبەرەکان دەڵێت، دەستیان بەسەر زیاتر لە 26 کیلۆگرام مادەی هۆشبەر دا گرتووە و 11 کەسیان بە تۆمەتی مامەڵەکردن بەو مادەیەوە دەستگیر کردووە.
رۆژی سێشەممە، 4ـی ئاداری 2025، بەڕێوەبەرایەتیی نەهێشتنی مادە هۆشبەرەکان لە راگەیێندراوێکدا گوتی: "لە ژمارەیەک چالاکییدا لە دوو هەفتەی رابردوو، بە هاوکاری و هاوئاهەنگیی نێوان بەڕێوەبەرایەتیی نەهێشتنی مادە هۆشبەرەکان و بەڕێوەبەرایەتییەکانی ئاسایشی پیرمام و سۆران و چاودێری و بەدواداچوون، پاش وەرگرتنی بڕیاری دادوەری لێکۆڵینەوەی ئاسایش توانرا بڕی 26 کیلۆ و 208 گرام مادەی هۆشبەر لە جۆرەکانی (کریستاڵ و حشیش و هیرۆین) هەڵبگیرێتەوە و دەستی بەسەردا بگیرێت."
دەشڵێت، بەهۆی ئەم چالاکیانە توانرا ژمارەیەک تۆڕی کڕین و فرۆشتن و بڵاوکردنەوەی مادەی هۆشبەر دەستگیربکرێن و هەڵبوەشێنەوە کە پێکهاتوون 11 تۆمەتبار.
لە دادگە دۆسیەی تاوان بۆ تەواوی ئەو تۆمەتبارانەی کە دەستگیرکراون، کراوەتەوە و "بەپێی یاسای بەرەنگاربوونەوەی مادە هۆشبەرەکان و کارتێکەرە ئەقڵییەکان مامەڵەیان لەگەڵدا دەکرێت."
بەڕێوەبەرایەتییەکە هاوڵاتیان ئاگادار دەکاتەوە کە "بەهەموو شێوەیەک خۆ بەدووربگرن لەم مادانە و هەر زانیارییەکیشتان دەستکەوت لەسەر ئەو کەسانەی کە مامەڵە بەو مادانە دەکەن، بنکە و بەڕێوەبەرایەتییەکانی ئاسایش ئاگادار بکەنەوە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ