رووداو دیجیتاڵ
بەڕێوەبەرایەتیی گشتیی نەهێشتنی مادە هۆشبەرەکانی دەزگای ئاسایشی هەرێمی کوردستان رایگەیاند، لە سنووری پارێزگای سلێمانی دوو بازرگانی مادەی هۆشبەریان دەستگیرکردووە و دەستیشیان بەسەر بڕی "دوو کیلۆگرام مادەی هۆشبەر لە جۆری کریستاڵ، چەکێکی بێمۆڵەت و دوو ئۆتۆمبێلدا گرتووە."
بە گوێرەی راگەیێندراوێکی بەڕێوەبەرایەتییەکە، رۆژی سێشەممە، 03ـی حوزەیرانی 2025، دوای کۆکردنەوەی "زانیاریی ورد" و بەدواداچوونی هێزەکانیان لە سنووری سلێمانی، توانیویانە بە فەرمانی دادوەری لێکۆڵینەوەی ئاسایش، لە چالاکییەکدا دوو بازرگانی مادەی هۆشبەر دەستگیربکەن.
لە راگەیێندراوەکەدا هاتووە: "لەو چالاکییەدا دەستبەسەر بڕی (2) کیلۆگرام مادەی هۆشبەر لە جۆری (کریستاڵ) گیرا، هەروەها چەکێکی بێ مۆڵەت و دوو ئۆتۆمبێلیش کە بۆ گواستنەوەی مادەکە بەکارهاتبوون، دەستیان بەسەردا گیراوە."
بەڕێوەبەرایەتیی گشتیی نەهێشتنی مادە هۆشبەرەکان ئاماژەی بەوەشکردووە، "لە ئێستادا هەردوو بازرگانەکە بە بڕیاری دادوەر و بەپێی مادەی (25) لە یاسای بەرەنگاربوونەوەی مادە هۆشبەرەکان و کارتێکارە ئەقڵییەکان راگیراون و لێکۆڵینەوە لە دۆسیەکانیان بەردەوامە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ