هەڵەیەک روویدا! دووبارە هەوڵبدە
رووداو دیجیتاڵ
بەڕێوەبەری گشتیی کشتوکاڵی دهۆک رایگەیاند، ئەم ساڵ زیاتر لە هەزار و 350 تۆن سماق و برنجیان هەناردەی تورکیا کردووە. راشیگەیاند زیاتر لە 209 هەزار تۆن بەرهەمی کشتوکاڵیش هەناردەی نێوەڕاست و خوارووی عێراق کراوە.
رۆژی پێنجشەممە، 02-10-2025، ئەحمەد جەمیل بە تۆڕی میدیایی رووداوی راگەیاند: "ساڵانە بەشێکی زۆری بەرهەمە کشتوکاڵییەکانی دهۆک لە دەرەوە ساخ دەکرێنەوە، بەڵام ئەم ساڵ بەهۆی کاریگەریی وشکەساڵی و داخستنی دوو دەروازە لە پارێزگەکەمانەوە بۆ نەینەوا، هەناردەکردنی بەرهەم بەراورد بە پار کەمی کردووە، چونکە ئێستا تەنیا لە یەک دەروازەوە بەرهەم هەناردە دەکرێت."
پار تاوەکو ئەم کاتانە، 224 هەزار و 739 تۆن بەرهەم بۆ شارەکانی خواروو و نێوەڕاستی عێراق نێردرابوو. بەڕێوەبەری گشتیی کشتوکاڵی دهۆک گوتی: "تەنیا لە مانگی ئەیلوولدا، 45 هەزار و 944 تۆن پەتاتە، تەماتە، خەیار، هەنجیر، لۆبیا، پیاز و ترێ بۆ شارەکانی خواروو و نێوەڕاستی عێراق نێردراوە، لە سەرەتای ئەم ساڵیشەوە 209 هەزار و 391 تۆن هەناردە کراوە."
جگە لە پارێزگاکانی عێراق، بەرهەمە کشتوکاڵییەکانی دهۆک بۆ تورکیاش دەنێردرێن. لەوبارەیەوە ئەحمەد جەمیل گوتی: "لە سەرەتای ئەم ساڵەوە تاوەکو ئێستا هەزار و 288 تۆن سماق، 71 تۆن برنج، هەزار و 250 کیلۆگرام فستقی تەڕ، 150 کیلۆگرام هەنجیری وشک و 250 کیلۆگرام مێوژ بۆ تورکیا هەناردە کراوە."
بەپێی ئامارە فەرمییەکان، پار بەرهەمهێنانی پەتاتە لە پارێزگای دهۆک گەیشتووەتە نزیکەی 625 هەزار تۆن و نزیکەی 900 هەزار دۆنم زەوی بە گەنم چێندرابوو، هەروەها زیاتر لە 39 هەزار دۆنم زەوی لە سنووری پارێزگای دهۆک بە دار مێو داچێنرابوو.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ