رووداو دیجیتاڵ
ئەمڕۆ سێیەم رۆژ و دوایین رۆژی فێستیڤاڵی هەنار و پاییزی هەڵەبجەیە. بەڕێوەبەری شارەوانیی هەڵەبجە دەڵێت، لە فێستیڤاڵەکەدا رێز لە ژینگە نەگیراوە و زیاتر لە 52 تۆن زبڵی دوو رۆژیان کۆکردووەتەوە.
رۆژی شەممە، 4ـی 11-2023 سەلام بیلال، بەڕێوەبەری شارەوانیی هەڵەبجە بە تۆڕی میدیایی رووداوی گوت، "لە رۆژی یەکەمی فێستیڤاڵی هەناردا پێنج بارهەڵگر و رۆژی دووەم 10 بارهەڵگر زبڵ کۆکراوەتەوە کە زیاتر لە 152 تۆن زبڵ بوو".
بەڕێوەبەری شارەوانیی هەڵەبجە دەڵێت، خۆیان بە بەشێک لە رێکخەرانی فێستیڤاڵی هەنار و پاییزی هەڵەبجە دەزانن، بەڵام بەشێکی ئەوانەی تێیدا ئامادەبوون "رێزی ژینگەیان نەگرتووە". گوتیشی، "دەبووایە فرۆشیارەکان ئاگادار بکرانایەوە کە پاکوخاوێنی بپارێزن و لە رێگەی پۆستەریشەوە هۆشیاری و زانیاری بدرایەتە میوانان".
هەر ئەمڕۆ شەممە، ستار مەحموود، بەڕێوەبەری کشتوکاڵی هەڵەبجە بە تۆڕی میدیایی رووداوی گوت، "ئەمڕۆ دوایین رۆژی فێستیڤاڵی هەنار و پاییزی هەڵەبجەیە؛ لە دوو رۆژی رابردوودا فێستیڤاڵەکە بە رێکوپێکی بەڕێوەچووە و هیچ رووداوێکی نەخوازراو رووینەداوە و زیاتر لە 190 هەزار کەس سەردانیان کردووە".
نۆیەمین فێستیڤاڵی هەنار و پاییزی هەڵەبجە کاژێر 10ـی بەیانیی 2ـی 11 دەستیپێکرد. ئەمڕۆ دوایین رۆژیەتی و تێیدا 50%ی شوێنەکە تایبەتە بە هەنار و ئەو بەرهەمە خۆماڵییانەی لەکاتی پێگەیشتندان؛ نیوەکەی دیکەی تایبەتە بە کاری دەستی و خواردنە کوردەوارییەکان. جگە لە هەنار، گوێزی هەورامان، توو، سرکە، هەنگوین، دۆشاو و بەرهەمەکانی دیکەی ناوچەکە نمایش کراون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ