رووداو دیجیتاڵ
لە سنووری قەزای کۆیە لەکاتی یاری (ئۆفڕۆد) کە نمایشی ئۆتۆمبێلە لەنێو قوڕدا، ئۆتۆمبێلێک خۆی کرد بەنێو تەماشاکاراندا و حەوت کەسی بریندار کرد. گوتەبێژی تەندروستیی کۆیە دەڵێت، دۆخی بریندارەکان باشە.
ئەمڕۆ هەینی 05-01-2024، لەکاتی یاری و نمایشی ئۆتۆمبێل لەنێو قوڕدا لە سنووری قەزای کۆیە، دوای ئەوەی شۆفێری ئۆتۆمبێلێک نەیتوانی بەسەر بەرزییەکدا سەرکەوێت بە دوادا گەڕایەوە و خۆی کردە نێو ئەو کەسانەی تەماشاکاربوون و بەهۆیەوە حەوت کەس بریندار بوون.
هاوکار عەلی، گوتەبێژی تەندروستی کۆیە ئەمڕۆ هەینی بە تۆڕی میدیایی رووداوی گوت، حەوت بریندار براونەتە فریاکەوتنی کۆیە.
هاوکار عەلی گوتی، دوو لە بریندارەکان قاچیان شکاوە، یەکێکیان دەستی شکاوە و ئەوانی دیکەش لەبەشەکانی دیکەی جەستەیاندا شکاوی و برینداربوون هەبووە. گوتیشی، "سەرجەمیان تەندروستییان باشە و چارەسەری پێویستیان بۆ کراوە".
ئۆفڕۆد جۆرێکە لە نمایشی ئۆتۆمبێل و سەرکەوتن بە شوێنی بەرزدا لەنێو قوڕدا، ماوەی چەند ساڵێکە لە شارە جیاکانی هەرێمی کوردستان لە وەرزی زستاندا بەڕێوەدەچێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ