رووداو دیجیتاڵ
هاونیشتمانییەکی خەڵکی سلێمانی دەستڕێژی گوللەی لێکرا و لە ئۆتۆمبێلەکەی خۆیدا کوژرا. پەیامنێری رووداو دەڵێت، سەرچاوەیەکی پۆلیس پێی راگەیاندووە، بکوژ ناسراوەتەوە و فەرمانی دەستگیرکردنی بۆ دەرچووە.
رووداوەکە نیوەڕۆی ئەمڕۆ دووشەممە 05-01-2026 لەنزیک گوندی کۆڵەبیی نێوان عەربەت و سلێمانی روویداوە. ئەرکان عەلی، پەیامنێری تۆڕی میدیایی رووداو لەبەردەم دادپزیشکیی سلێمانی رایگەیاند، ''تەرمی کوژراوەکە هێندراوەتە ئێرە کە لەنێو ئۆتۆمبێلەکەی خۆیدا دەستڕێژی گوللەی لێکراوە.''
ئەوەی تەقەی لێکراوە ناوی دارا رەزا، لەدایکبووی ساڵی 1969یە و ئاژەڵدارە. کامەران عەلی، مامی کوژراوەکە قسەی بۆ رووداو کرد و گوتی، ''منداڵەکان هاتن گوتیان دارا بریندارە، ئێمەش کە چووین لای گۆڕستانەکەی دەرەوەی گوند، بە سێ گوللە بریندار کرابوو.''
بە گوتەی کامەران عەلی، دوای گەیاندنی بە نەخۆشخانەی شۆڕش، برازاکەی بەهۆی سەختیی برینەکانیەوە گیانی لەدەستداوە.
تاوەکو ئێستا زانیاریی ورد لەسەر هۆکاری کوشتنی هاونیشتمانییەکە بڵاونەکراوەتەوە، بەڵام سەرچاوەیەک لە ئاسایشی سلێمانی بە پەیامنێری رووداوی راگەیاند، بکوژ ناسراوەتەوە و فەرمانی دەستگیرکردنی بۆ دەرچووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ