هەڵەیەک روویدا! دووبارە هەوڵبدە
ئاری هەرسین، بەرپرسی لقی 4ـی پارتی دیموکراتی کوردستان لە سلێمانی
رووداو دیجیتاڵ
بەرپرسی لقی 4ـی پارتی دیموکراتی کوردستان لە سلێمانی، دەستپێکردنی فەرمیی بانگەشەی هەڵبژاردنی پارتی لە پارێزگاکانی سلێمانی، هەڵەبجە و دەڤەری راپەڕین راگەیاند و دەڵێت، نزیکەی شەش مانگە ئامادەکارییەکانیان بۆ هەڵبژاردن دەستیپێکردووە و ئەمڕۆش بە هەڵواسینی فلێکس و رازاندنەوەی بارەگاکان لە شەقام و کۆڵانەکاندا، بانگەشەکە بە فەرمی رادەگەیەنرێت.
ئاری هەرسین، بەرپرسی لقی 4ـی پارتی دیموکراتی کوردستان لە سلێمانی، لە بووڵتەنی کاژێر 12:00ـی تۆڕی میدیایی رووداودا کە سەنگەر عەبدولڕەحمان پێشکێشی دەکات، رایگەیاند، ئەگەر لە کورسییەکانی پێشوویان زیاتر نەهێنن، کورسییەکانی پێشوو دەهێننەوە و یەکەم دەبن.
ئاری هەرسین گوتی: "ئامانجمان بەدەستهێنانی 7 کورسییە لەو دەڤەرەدا و پارتی رکابەری یەکێتییە لە بازنەی سلێمانی."
بەرپرسی لقی پارتی لە سلێمانی جەختی لەسەر پێویستیی یەکڕیزیی لایەنە کوردییەکان لە بەغدا کردەوە و رایگەیاند، گۆڕانکاری لە عەقڵیەتی لایەنە عێراقییەکان و یەکڕیزیی کورد لە بەغدا، دوو فاکتەری سەرەکیی سەرکەوتنی هەرێمی کوردستانن. گوتیشی: "پێویستە کورد هەمووی یەک فراکسیۆن بێت لەناو پەرلەمانی عێراقدا."
لەبارەی کەمپەینی هەڵبژاردن، ئاری هەرسین داوای کرد بانگەشەکردن بە نرخی شکاندنی بەرامبەر نەبێت و گوتی: "ئەم رێکلامکردنە نابێت لەسەر شکاندنی بەرامبەر بێت یان تەشهیری نابەجێ."
ئاری هەرسین ئاماژەی بەوەدا کە لە هەڵبژاردنی پێشووشدا پارتی دەستپێشخەری هێرشکردنە سەر لایەنەکانی دیکەی نەکردووە و هیوادارە لایەنەکان بە دڵی خۆیان بانگەشە بکەن، بەبێ دروستکردنی کاردانەوە.
سەبارەت بە هەڵبژاردنی بەربژێرەکان، ئاری هەرسین روونی کردەوە کە پەروەردەی ئەکادیمی تاکە پێوەر نییە و پێویستە کاندیدەکان توانای قسەکردن بە زمانی عەرەبی، توانای گفتوگۆ و دانوستاندن، گوێگرێکی باش، بوێری و بەرگری لە میللەتەکەیان هەبێت. جەختی لەوەش کردەوە کە ئامانجی سەرەکیی بەربژێر نابێت دەستکەوتی کەسی بێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ