رووداو دیجیتاڵ
یاریدەدەری هاوسەرۆکی دەم پارتی بە رووداوی راگەیاند: "بە ئەگەرێکی زۆرەوە ئیلهام ئەحمەد لە رێگەی زوومەوە بەشداری لە کۆنفرانسی نێودەوڵەتیی ئاشتی و کۆمەڵگەی دیموکراسی دەکات." هەر بە گوێرەی دەم پارتی، لە هەرێمی کوردستانەوە دڵشاد شەهاب، گوتەبێژی سەرۆکایەتیی هەرێمی کوردستان؛ ئەمینه زکری، نوێنەری سەرۆک بارزانی و ئەندامی مەکتەبی سیاسیی پارتی دیموکراتی کوردستان؛ بەیان سامی عەبدولڕەحمان، نوێنەری مەسرور بارزانی، سەرۆکوەزیرانی هەرێمی کوردستان و دارا خەیلانی، نوێنەری بافڵ تاڵەبانی، سەرۆکی یەکێتیی نیشتمانیی کوردستان بانگهێشت کراون.
کۆنفرانسی نێودەوڵەتیی ئاشتی و کۆمەڵگەی دیموکراسی، لەلایەن دەم پارتی لە رۆژانی 6 و 7ی کانوونی یەکەمی 2025 لە ئیستەنبووڵ بەڕێوەدەچێ.
ئێبرو گونای، یاریدەدەری هاوسەرۆک و بەرپرسی پەیوەندییەکانی دەرەوەی دەم پارتی، بەشداری لە بووڵتەنی کاژێر 19:00ی رووداودا کرد و وەڵامی پرسیارەکانی نالین حەسەنی دایەوە.
ئێبرو گونای لەبارەی بەشداریکردنی ئیلهام ئەحمەد، هاوسەرۆکی فەرمانگەی پەیوەندییەکانی دەرەوەی بەڕێوەبەرایەتیی خۆسەر گوتی: "دەمانەوێ ئیلهام ئەحمەد بێتە ئیستەنبووڵ و بەشداری لە کۆنفرانسەکەدا بکات، لەمبارەیەوە هەوڵمان هەیە. بەڵام بە ئەگەرێکی زۆر لە رێگەی زوومەوە بەشداری لە کۆنفرانسەکەدا بکات."
گونای رایگەیاند: "پرسی کورد ئیدی پرسێکی نێودەوڵەتییە و دۆستانی کورد لە سەرانسەری جیهان بۆ کورد تێدەکۆشن."
یاریدەدەری هاوسەرۆک و بەرپرسی پەیوەندییەکانی دەرەوەی دەم پارتی ئاماژەی بەوەشکرد، بانگهێشتنامەیان بۆ مەهەپە و ئاکپارتیش ناردووە.
گونای، لەبارەی ئامانجی رێکخستنی کۆنفرانسەکە گوتی، دەیانەوێ ئەزموونی پرۆسەکانی ئاشتی و دیموکراسی لە جیهاندا بکەنە رێبەر بۆ چارەسەرکردنی پرسی کورد.
ئێبرو گونای ئاماژەی بەوەکرد کە ئۆجەلان لەم پرۆسەیەدا "ئەکتەری سەرەکییە" و گوتی: "پێویستییەکی گەورە هەیە بۆ بەشداریکردنی بەڕێز ئۆجەلان لە پرۆسەکەدا. چاوەڕێین ئەم گفتوگۆ نێودەوڵەتییانە و بەشداریی رۆشنبیرانی جیهان ببێتە هۆکارێک بۆ دەستپێکردنی دیدارێکی رووبەڕوو لەگەڵ ئۆجەلان."
ئێبرو گونای باسی لەوە کرد کە دەیانەوێ پەیوەندییە نێودەوڵەتییەکانیان بەهێز بکەن و سوود لە ئەزموونی هەرێم و وڵاتانی وەک ئێرلەندا، کەتەلۆنیا، باشووری ئەفریقا و هیندستان وەربگرن و گوتی: "دەمانەوێ لە ئەزموونەکانیانەوە فێربین و هاتنیان بۆ ئێمە زۆر گرنگە."
لە کۆنفرانسی نێودەوڵەتیی ئاشتی و کۆمەڵگەی دیموکراسی گوتاری دەستپێک لەلایەن یەکێک لە هاوسەرۆکانی دەم پارتی پێشکێش دەکرێ.
بە گوێرەی دەم پارتی، لە هەرێمی کوردستانەوە دڵشاد شەهاب، گوتەبێژی سەرۆکایەتیی هەرێمی کوردستان؛ ئەمینه زکری، نوێنەری سەرۆک بارزانی و ئەندامی مەکتەبی سیاسیی پارتی دیموکراتی کوردستان؛ بەیان سامی عەبدولڕەحمان، نوێنەری مەسرور بارزانی، سەرۆکوەزیرانی هەرێمی کوردستان و دارا خەیلانی، نوێنەری بافڵ تاڵەبانی، سەرۆکی یەکێتیی نیشتمانیی کوردستان بانگهێشت کراون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ