رووداو دیجیتاڵ
وەزیری دەرەوەی ئەمریکا لە واشنتن لەگەڵ نادیە موراد کۆبووەوە و پاڵپشتی حکومەتی وڵاتەکەی بۆ کوردانی ئێزدی دووپاتکردەوە.
رۆژی چوارشەممە، 6ـی شوباتی 2024، ئەنتۆنی بلینکن، وەزیری دەرەوەی ئەمریکا دوای کۆبوونەوەی لەگەڵ نادیە موراد، باڵیۆزی نیازپاکیی نەتەوە یەکگرتووەکان و براوەی خەڵاتی نۆبڵ بۆ ئاشتی، لە پۆستێکدا لە ئێکس پاڵپشتی حکومەتی وڵاتەکەی بۆ کوردانی ئێزدی رزگاربووی دەستی داعش راگەیاند.
بلینکن لەبارەی کۆبوونەوەکەی لەگەڵ نادیە موراد نووسیوویەتی، "پاڵپشتیی نەگۆڕمان بۆ دادپەروەری و چاکبوونەوەی ئێزدییەکان و ئەوانەشی رزگاربووی جینۆسایدن لە عێراق و سووریا دووپاتکردەوە".
لە هێرشی داعشدا بۆ سەر شنگال لە 3ـی ئابی 2014، داعش کوردانی ئێزدیی کۆمەڵکوژ کرد و شەش هەزار و 417 کەسیشی رفاند.
بەگوێرەی نووسینگەی رزگارکردنی رفێندراوانی دەستی داعش بۆ رووداو، تاوەکو ئێستا 3 هەزار و 575 کوردی ئێزدی لەدوای رفاندنیانەوە رزگار کراون.
هێرشەکە بووە هۆی ئاوارەبوونی بەشی زۆری کوردانی ئێزدی لە سنووری شنگال و تاوەکو ئێستاش زیاتر لە 280 هەزار کەسیان لە ناوچەکانی دیکەی هەرێمی کوردستان دەژین. ئەوە جگە لەوەی لە هەمان کاتدا 130 هەزار کوردی ئێزدیش چوونە دەرەوەی وڵات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ