رووداو دیجیتاڵ
سەرۆکی حکومەتی هەرێمی کوردستان پێشوازیی لە لیژنەی شەهیدان و قوربانییان و زیندانییانی سیاسی پەرلەمانی عێراق کرد و رایگەیاند، داوایان لە حکومەتی فیدراڵی ئەوەیە بەشێوەیەکی شایستە، قەرەبووی کەسوکاری شەهیدان و زیانلێکەوتووانی رژێمی پێشوو بکاتەوە.
ئەمڕۆ (دووشەممە، 6-5-2024) مەسرور بارزانی، سەرۆکی حکومەتی هەرێمی کوردستان، پێشوازی لە لیژنەی شەهیدان و قوربانییان و زیندانییانی سیاسیی سەر بە ئەنجوومەنی نوێنەرانی عێراق کرد.
حکومەتی هەرێمی کوردستان لەبارەی ناوەڕۆکی کۆبوونەوەکە رایگەیاند "گفتوگۆ لەبارەی پەرەپێدانی هاریکاری و هەماهەنگیی نێوان حکومەتی هەرێمی کوردستان و حکومەتی فیدراڵ لەپێناو خزمەتکردنی زیاتری کەسوکاری شەهیدان و ئەنفالکراوان و زیانلێکەوتووانی دەستی رژێمی پێشووی عێراق کرا."
سەرۆکی حکومەت بەپێی راگەیێندراوەکە "دووپاتیکردەوە کە خەڵکی کوردستان، قوربانییەکی زۆری داوە و رووبەڕووی دڕندانەترین شاڵاوەکانی ئەنفال و کیمیاباران و کۆمەڵکوژی و وێرانکاری بووەتەوە، داوامان لە حکومەتی فیدراڵ ئەوەیە؛ رێز لە قوربانیدانەکانی خەڵکی کوردستان و هەموو قوربانییانی دەستی رژێمی پێشووی عێراق بگرێت و بە شێوەیەکی شایستە، قەرەبووی کەسوکاری شەهیدان و زیانلێکەوتووانی رژێمی پێشوو بکاتەوە."
رژێمی بەعس لە ساڵی 1968 بۆ 2023 جگە لە وێرانکردنی ژمارەیەکی زۆر لە دێهاتەکانی هەرێمی کوردستان و پرۆسەی بەبەعسی و بەعەرەبکردن و راگواستنی کورد، هەروەها دەیان هەزار هاونیشتمانیی کوردی لە شاڵاوەکانی ئەنفال و کیمیابارانکردنی هەڵەبجە لە ساڵی 1988 شەهید کرد.
سەرۆکی حکومەت لە کۆبوونەوەکەدا جەختیشی کردەوە لەوەی "هەرچی پێمان بکرێت بۆ خزمەتکردنی کەسوکاری شەهیدان و ئەنفالکراوان، دەیکەین و کەمتەرخەمی ناکەین."
سەرۆک و ئەندامانی لیژنەی شەهیدان و قوربانییان و زیندانییانی سیاسیی ئەنجوومەنی نوێنەران، کورتەیەکیان دەربارەی کار و پرۆژە و ئامانجی سەردانەکەیان خستەڕوو، بەگوێرەی راگەیێندراوەکە "ئاماژەیان بەوەدا کە ئامانجیان بەهێزکردنی هەماهەنگییە لەگەڵ وەزارەتی کاروباری شەهیدان و ئەنفالکراوان لەپێناو هەموارکردنەوەی چەند یاسایەک بۆ خزمەتکردن و قەرەبووکردنەوەی کەسوکاری شەهیدان و زیندانییانی سیاسی و زیانلێکەوتووانی دەستی رژێمی پێشووی عێراق."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ