وەزیرى خوێندنى باڵا: بۆ ساڵى نوێى خوێندن زۆرترین دەرفەتى خوێندن لە زانکۆکان دەڕەخسێنین

 

 

سێشەممە 06-06-2023 وەزارەتى خوێندنى باڵا و توێژینەوەى زانستى، بە سەرپەرشتیی ئارام محەممەد، وەزیری خوێندنی باڵا، بریکارى وەزارەت، راوێژکاران، بەڕێوەبەرانى گشتیى خوێندن، پلاندانان و بەدواداچوون، کۆبوونەوەى لیژنەى باڵاى وەرگرتن بە بەشداریى یاریدەدەرى سەرۆکى زانکۆ و بەڕێوەبەرى تۆمارى سەرجەم زانکۆ حکومییەکانى هەرێمى کوردستان بەڕێوەچوو.

 

بەگوێرەی راگەیێندراوێکی وەزارەتی خوێندنی باڵا، لە کۆبوونەوەکەدا پلان و بەرنامەکانى وەزارەت لەبارەی وەرگرتنى خوێندکاران و قوتابیان، گواستنەوە و دابەزین بۆ ساڵى خوێندنى (2023 - 2024) گفتوگۆى لەبارەوە کرا، هەروەها چەند بابەتێکى گرنگ و پەیوەست بە شێوازى وەرگرتن لە زانکۆ و پەیمانگەکان خرایەڕوو و بەرنامەى پێویستیان لەبارەوە بۆ دانرا.

 

عەباس ئەکرەم، گوتەبێژی وەزارەتی خوێندنی باڵا و توێژینەوەی زانستی بە رووداوی گوت، "ئامانجی کۆبوونەوەکە دانانى رێکار و پلانى وەرگرتنە بۆ ساڵى نوێى خوێندن، بە شێوەیەک هاوتەریب بێت بۆ سوودى دەرچووان و پێداویستییەکانى بازاڕى کار. بۆ یەکەمجار لە مێژووى خوێندنى باڵا لە هەرێمى کوردستان، لە ماوەى ساڵانى رابردوو، توانیمان زۆرترین رێژەى پلانى وەرگرتن بۆ دەرچووانى 12ی ئامادەیى لە زانکۆ و پەیمانگەکان تەرخان بکەین و هەلى گونجاوى خوێندن لە زانکۆ حکومییەکان بۆ دەرچووان بڕەخسێنین و دادپەروەرى و شەفافیەت لەنێوان کوڕان و کچان هەبێت."

 

بەپێی راگەیێندراوەکەی وەزارەتی خوێندنی باڵا، د. ئارام محەممەد قادر لە کۆبوونەوەکەدا جەختی لەوە کردووەتەوە، "وەزارەتى خوێندنى باڵا بە رەچاوکردنى کوالێتیى خوێندن و لە چوارچێوەى جێبەجێکردنى پلانێکى تۆکمە، کار بۆ وەرگرتنى خوێندکاران و قوتابیان لە زانکۆ و پەیمانگەکان دەکات. بە هەمان رووحیەتى ساڵانى پێشوو و بە رەچاوکردنى کوالێتىی خوێندن، زۆرترین دەرفەتى خوێندن بۆ دەرچووانى ئامادەیى لە زانکۆ و پەیمانگە حکومییەکانى هەرێمى کوردستان دەڕەخسێنین، لەو چوارچێوەیەشدا وەزارەت هاوکار و پاڵپشتى زانکۆکان دەبێت."

 

لەبارەی ژمارەی دەرفەتی خوێندن لە زانکۆکان، گوتەبێژی وەزارەتی خوێندنی باڵا ئەوەی خستەڕوو، "ژمارەکە پەیوەستە بە ژمارەی دەرچوون لە پۆلی 12."