وەزارەتی ناوخۆ: ئەو شوێنە گەشتیارییانەی خەڵک تێیدا خنکاون دادەخرێن

 

رۆژی یەکشەممە، 06-08-2023، وەزارەتی ناوخۆی حکومەتی هەرێمی کوردستان راگەیێندراوێکی لەبارەی شوێنە گەشتیارییەکان بڵاوکردەوە و ئاماژەی بەوەکرد، "دوای زیادبوونی رووداوەکانی خنکانی هاووڵاتییان و گەشتیاران لە رووبار و دەریاچە، زێ و چەمەکان لە وەرزی هاویندا، بە فەرمانی وەزیری ناوخۆ، بەڕێوەبەرایەتییەکانی بەرگریی شارستانی و پۆلیس ئەو شوێنە گەشتیارییانە دادەخەن کە لە ماوەی رابردوو هاووڵاتییان و گەشتیاران لێیان خنکاون و مەترسیدارن بۆ مەلەکردن. ئەمەش بە ئامانجی کەمکردنەوەی دەرفەت و ئەگەرەکانی قوربانی زیاتر".

 

لە راگەیێندراوەکەی وەزارەتی ناوخۆدا هاتووە: "دەستەی گشتی گەشتوگوزار، دەستەی پاراستن و چاککردنەوەی ژینگە، فەرمانگەی میدیا و زانیاری، ناوەندی هاوبەشی هاوئاهەنگیی قەیرانەکان و دامەزراوە پەیوەندیدارەکانی دیکە هەڵمەتی ئاگادارکردنەوە و هۆشیارکردنەوەی هاووڵاتییان و گەشتیاران بۆ خۆپاراستن لە مەلەکردن لەو شوێنە مەترسیدارانە دەستپێدەکەن."

 

وەزارەتی ناوخۆی حکومەتی هەرێمی کوردستان داوا لە هاووڵاتی و گەشتیاران و کۆمپانیاکانی گەشتوگوزار دەکات پابەند بن بە دوورکەوتنەوە لەو شوێنانەی شریتی سووری لێدراوە و هێما و تابلۆکانی قەدەخەکردنی مەلەی لێ هەڵواسراوە. "ئەو شوێنانە مەترسیدارن و بەهیچ شێوەیەک ناکرێت مەلەی تێدا بکرێت و بۆ مەلەکردن ناشێن و رێگاپێدراو نین".

 

لەماوەی کەمتر لە مانگێکدا، تەنیا لە ئاوی زێی بچووک، هەشت کەس خنکاون، شەش کەسیان لە قەزای دووکان و دوو کەسیان لە سنووری ئیدارەی راپەڕین بوون.