رووداو دیجیتاڵ
سەرۆکی رێکخراوی فەلەکناسی کوردستان دەڵێت، "کاژێر 06:28ی ئێوارەی سبەی مانگگیران دەستپێدەکات، بەڵام بە چاو نابیندرێت تاوەکو کاژێر 07:30 کە لەو کاتەوە هەستی پێدەکرێت."
ئەژی چەتۆ، سەرۆکی رێکخراوی فەلەکناسیی کوردستان ئەمڕۆ شەممە بە تۆڕی میدیایی رووداوی گوت، "کاژێر 09:11ی سبەی شەو مانگگیران دەگاتە لووتکە و دواتر بە چەند قۆناخێک دەکرێتەوە، بەگشتی کاژێر 11:55ی شەو دۆخەکە ئاسایی دەبێتەوە."
نەبەز ئیسماعیل، گوتەبێژی وەزارەتی ئەوقاف و کاروباری ئایینیی هەرێمی کوردستان بە تۆڕی میدیایی رووداوی گوت، "نوێژی مانگگیران هەیە و بابەتێکی شەرعییە، بۆیە سبەی خەڵک نوێژ دەکەن و دەکرێت لە مزگەوتەکانیش نوێژ و نزا بکرێت."
گوتەبێژی وەزارەتی ئەوقاف ئاماژەی بەوەش کرد، بابەتەکە ناچاری نییە و هیچ رێنوێنییەکیش نییە کە مزگەوتەکان ناچار بکرێن نوێژ بکەن.
هاوکات مەحموود قەیسی، بەڕێوەبەری راگەیاندنی وەقفی سوننی عێراق بە رووداوی گوت، "سبەی یەکشەممە کاژێر هەشت و نیوی ئێوارە لە هەموو مزگەوتەکانی وەقفەکەمان نوێژی مانگگیران دەکرێت."
مەحموود قەیسی گوتی، "سەرجەم مزگەوتەکانی سنووری وەقفەکەمان ئاگادار کردوونەتەوە ئەو نوێژە بکەن و پێش نوێژەکەش لە بڵندگۆی مزگەوتەکانەوە خەڵکی لە نوێژەکە ئاگادار دەکرێنەوە."
ئامادەکردن: سۆران حوسێن و گەشاو خالید
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ