کوردستان
یاریگەی فرەنسۆ هەریری بۆ بانگەشەی پارتی بۆ هەڵبژاردنی پەرلەمانی عێراق ئامادە کراوە. وێنە: بڵند تاهیر - رووداو
رووداو دیجیتاڵ
ئەندامێکی کۆمیتەی ناوەندیی پارتی دیموکراتی کوردستان دەڵێت، ئەمڕۆ پارتی دیموکراتی کوردستان دوایین پەیامی خۆی بۆ خەڵکی کوردستان دەبێت و سەرۆک بارزانی دوایین گوتاری بانگەشە پێشکێش دەکات.
چیا هەرکی، ئەندامی کۆمیتەی ناوەندی و جیگری بەرپرسی مەکتەبی رێکخستنی پارتی لە هەولێر بە رەنجە جەمال، پەیامنێری رووداوی گوت، "ئەمڕۆ دوایین بانگەشەی پارتی دەبێت لە عێراق و هەرێمی کوردستان، جەنابی سەرۆک دوایین پەیامی پارتی پێشکێشی جەماوەر دەکات، هەردوو جێگرانی بەڕێزی سەرۆکی پارتی، ئەندامانی مەکتەبی سیاسی و ئەندامانی کۆمیتەی ناوەندی بەرپرسانی حیزب و حکومی (ئەوانەی پارتین) ئامادە دەبن و هەموو بەربژێرانیش لە سنووری کوردستان ئامادە دەبن."
چاوەڕوان دەکرێت زیاتر لە 60 هەزار کەس ئامادەی کەرنەڤاڵەکەی پارتی بن. چیا هەرکی دەڵێت، "ئەگەر یاریگەی یەکەم پڕ بوو، یاریگای دووەمی فەرەنسۆ هەریری ئامادەکراوە و شاشەی گەورەی بۆ دانراوە."
بە گوتەی ئەو ئەندامەی کۆمیتەی ناوەندیی پارتی، دوای کەرنەڤاڵەکە، جەماوەری پارتی ئاهەنگی پێشوەختە سەرکەوتن دەگێڕین.
پێشتر نێچیرڤان بارزانی، جێگری سەرۆکی پارتی دیموکراتی کوردستان، چاڵێنجی یەک ملیۆن دەنگی بۆ پارتی راگەیاند، دواتر لە سلێمانی گوتی، "چاڵێنجەکە دەکەینە یەک ملیۆن و زیاتر."
چیا هەرکی لەبارەی ئەو چاڵێنجەوە گوتی، "ئێمە چاڵێنجی یەک ملیۆنیمان هەیە و هەولێر وەڵامی دەداتەوە، کە سەرووی ملیۆنیک دەهێنین."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ