فراکسیۆنی یەکگرتوو: دژی کەمکردنەوەی دەسەڵاتەکانی هەرێمی کوردستانین

 

رۆژی هەینی 9-6-2023، دارا سێکانییانی، ئەندامی پەرلەمانی عێراق لە فراکسیۆنی یەکگرتووی ئیسلامی کوردستان لەبارەی بەشێک لە بڕگەکانی مادەکانی 13 و 14ـی رەشنووسی بودجەی عێراق کە تایبەتن بە هەرێمی کوردستان بە تۆڕی میدیایی رووداوی راگەیاند، "ئێمە لەگەڵ بەرگری و داکۆکییمان لە مافی مووچەخۆران و فەرمانبەرانی هەرێمی کوردستان و دابینکردنی مووچەکانیان و گێڕانەوەی پاشەکەوتی مووچەیان، دژی هەر هەوڵێکین کە دەدرێت بۆ کەمکردنەوەی دەسەڵاتەکانی هەرێمی کوردستان. هەنگاوی لەو جۆرە قەوارەی هەرێمی کوردستان بچووک دەکاتەوە و زیانی پێدەگەیێنێت و لە بەرژوەندیی هەرێمی کوردستاندا نییە."

 

دارا سێکانییانی گوتی، "ئەو بڕگەیەی لە رەشنووسەکەدا هاتبێت و کاریگەریی نەرێنی لەسەر هەرێمی کوردستان و خەڵکەکەی هەبێت و مەترسی سیاسی بۆ قەوارەی هەرێمی کوردستان و لاوازکردنی بێت، ئێمە دژی دەبین."

 

پەرلەمانی عێراق لە دانیشتنی شەوی رابردوودا شەش مادەی لە پڕۆژەیاسای بودجە پەسند کرد و دانیشتنەکەی بۆ نیوەڕۆی رۆژی هەینی هەڵگرت بۆ ئەوەی دەنگ لەسەر مادەکانی دیکەی پڕۆژەیاساکە بدرێت.

 

پشکی هەرێمی کوردستان لە رەشنووسی بودجەکە 12.67٪ە، مادەی 13، 14 تایبەتە بە هەژماری بانکی و داهاتەکانی نەوت و کێڵگە نەوتییەکان و داهاتی دەروازە سنوورییەکانی هەرێمی کوردستان و شایستە داراییەکان و پاشەکەوتی مووچەی فەرمانبەران و چەند بابەتێکی دیکەی پەیوەندیدار بە کوردستانەوە.