گفتوگۆی رووداو لەگەڵ زریان رۆژهەڵاتی و رابەر تەڵعەت
رووداو دیجیتاڵ
بەپێی دوایین راپرسی ناوەندی لێکۆڵینەوەی رووداو، لە هەرێمی کوردستان 28٪ی دانیشتووانی هەرێمی کوردستان لە گەنجان پێکهاتوون؛ بەڕێوەبەری ناوەندەکە دەڵێت، راپرسییەکەیان لە 400 شوێنی هەرێمی کوردستان لەناو گوندنشینان و شارنشیناندا کردووە. لێکۆڵینڤانێکیش پێیوایە، دیمۆگرافیای هەرێمی کوردستان دیمۆگرافیایەکی گەنجانەیە.
بەگوێرەی ئەنجامەكانی راپرسیی روانگەی گەنجان - 2023 كە لەلایەن ناوەندی لێکۆڵینەوەی رووداو کراوە و تێیدا چاوپێكەوتنی راستەوخۆ لەگەڵ 1122 كەس لەسەرتاسەری هەرێمی كوردستان كراوە، دەرکەوتووە:
گەنجان لەڕووی دارایی، كۆمەڵایەتی و تەنانەت لەڕووی ئاسایشەوە زیاتر گرێدراوی بنەماڵە و خێزانن. 90.1%ی گەنجان نایانەوێت لە خێزان دووربكەونەوە. 52%یان پارە لە خێزان وەردەگرن و لەڕووی ئابوورییەوە گرێدراوی خێزانن. 66%یشیان گوتوویانە، کاتێک كێشەیەكیان بۆ دروست دەبێت پەنا بۆ خێڵ، خزم و كەسوكار دەبەن، ئەویش لەكاتێكدایە تەنیا 33%یان گوتوویانە، پەنا بۆ دامەزراوەی فەرمیی حكومەت دەبەن.
لەبارەی راپرسییەکەیانەوە، زریان رۆژهەڵاتی، بەڕێوەبەری ناوەندی لێکۆڵینەوەی رووداو لە بەرنامەی رووداوی ئەمڕۆدا کە نوێنەر فاتیح پێشکێشی دەکات، گوتی: راپرسییەکە مانگی 6ی ئەمساڵ بەشێوەیەکی ورد لە 400 ناوچەی جیاوازی هەرێمی کوردستان کراوە.
لە راپرسییەکەدا دەرکەوتووە، "خواستی خەڵک بۆ بەشداریی سیاسیی روو لە زیادبوونە"، ئەوەش بەهۆی ئەو جەمسەربەندییە سیاسییەی لە هەرێمی کوردستان دروست بووە.
راپرسییەکەی ناوەندی لێکۆڵینەوەی رووداو لە بەشێکیدا گەیشتووەتە ئەو دەرئەنجامەی کە بەشێوەیەكی گشتی كەمێك خواستی بەشداریكردنی سیاسی لای گەنجان زیاتر بووە، بۆ هەڵبژاردنیش، زیاتر لە 72% دەیانەوێت بەشداری لە هەڵبژاردن بكەن، ئەگەر مافی دەنگدانیان هەبێت، هەروەها 27٪یش دەڵێن بەشداری ناکەن.
لەوبارەیەوە زریان رۆژهەڵاتی دەڵێت: "گەنجانی هەرێمی کوردستان متمانەیان بە دامەزراوەکانی حکومەت زیاترە بەراورد بە عێراق، چونکە بەپێی راپرسییەکان 72٪ی گەنجی عێراق بە هیچ جۆرێک متمانەی بە دامەزراوەکانی حکومەت نییە."
هەر لە بەرنامەکەدا، رابەر تەڵعەت، لێکۆڵینڤان و شارەزای بواری راپرسی لەبارەی راپرسییەکەی ناوەندی لێکۆڵینەوەی رووداو دەڵێت: لەم راپرسییە و لە راپرسییەکانی پێشتریشدا دەردەکەوێت کە گەنجانی هەرێمی کوردستان گەنجانێکی تووڕەن لە جەمسەربەندی سیاسیی و خواست و متمانەی سیاسییان کەمە.
رابەر تەڵعەت گوتیشی: "بە لەبەرچاوگرتنی ناوەندی تەمەن ئێستا هەرێمی کوردستان دیمۆگرافیایەکی گەنجانەی هەیە، ئەم دیمۆگرافیا گەنجانەیەشی زیاتر لە سێکتەری وەبەرهێنان و ئابووریدا سوود و رەنگدانەوەی هەبووە."
لە راپرسییەکەی ناوەندی لێکۆڵینەوەی رووداودا پرسیار لە گەنجان کراوە سەبارەت بەوەی كە بۆچی دۆزینەوەی كار گرفتە بۆیان، 39.9% گوتوویانە مەرجەكانی كار قورسن، 30.5% نەزانینی زمانی بیانییان بە گرفتی بەردەم دۆزینەوەی كار زانیوە، 23%یش نەبوونی ئەزموونیان وەك هۆكارێك پیشانداوە. هەروەها 13%یش گوتوویانە توانای پێویست و سەردەمییانە بۆ كارەكان نییە و 11.9%یش گوتوویانە كە كارەكان بەگوێرەی ئەوان نین و13%یش باسی ئەوەیان كردووە كە نازانن لە كوێ بەدوای كاردا بگەڕێن.
لەبارەی بەشداریی گەنجان لە هەڵبژاردن و دابەشبوونی دەنگەکانیان بەسەر لایەنە سیاسییەکاندا، بەڕێوەبەری ناوەندی لێکۆڵینەوەی رووداو پێیوایە، پارتی دیموکراتی کوردستان و نەوەی نوێ زۆرترین چانسیان بۆ کۆکردنەوەی دەنگ لەناو گەنجاندا هەیە و ئەوان گەیشتوونەتە ئەو دەرئەنجامەی کە 46%ی گەنجان دەنگدەری پارتی دیموکراتی کوردستانن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ