هاوسەرۆکی کەجەکە چەکی دانا

 

رێوڕەسمەکە ئەمڕۆ 11ـی تەمموز لە ئەشکەوتی جاسەنە، لە سنووری ناحیەی سوورداش لە قەزای دووکان لە پارێزگای سلێمانی، کاژێر 11:25 دەستیپێکرد و 11:45 کۆتایی هات.

 

لەنێو گرووپەکەدا کە خۆیان ناو نابوو "گرووپی ئاشتی و کۆمەڵگەی دیموکراتیک"، بەسێ هۆزات، هاوسەرۆکی دەستەی بەڕێوەبەریی کەجەکە، نەدیم سەڤەن، تێکۆشین ئۆزان و تەکین مووش لە بەرپرسانی باڵای کەجەکە ئامادە بوون.

 

ئەو گرووپەی چەکەکانیان سووتاند 30ـی گەریلابوون، 15 ژن و 15 پیاو بوون. لە رێوڕەسمەکەدا بەسێ هۆزات، هاوسەرۆکی کەجەکە گوتارێکی پێشکێش کرد.

 

هاوسەرۆکی کەجەکە گوتی، "ئێمه‌ی ژنان و پیاوانی شه‌ڕڤانانی ئازادی، كه‌ له‌ کاتی جیادا به‌ ئامانجی شه‌ڕكردن له‌ دژی هێرشه‌كانی نكۆڵیكردن و قڕكردنی كورد به‌شداریمان له‌ ریزه‌كانی پەکەکەدا كردووه‌، چه‌كمان هه‌ڵگرتووه‌ و له‌ هه‌رێم و شوێنی جیاجیا تێكۆشانمان بەڕێوەبردووە، ئه‌مڕۆ وه‌ك وه‌ڵامێك بۆ بانگه‌وازییه‌كه‌ی رێبه‌ری گه‌لی كورد، عەبدوڵلا ئۆجەلان كه‌ له‌ راگه‌یێندراوه‌كه‌ی رێکەوتی 19-06-2025 بڵاوی كردبووه‌وه‌؛ هاتووین بۆ ئێره‌. هاتنه‌كه‌مان له‌سه‌ر بنه‌مای بانگه‌وازی 27ـی شوباتی 2025 بۆ "ئاشتی و كۆمه‌ڵگه‌ی دیموكراتیک"ـی رێبەر عه‌بدوڵڵا ئۆجەلان و بڕیاره‌كانی 12ـەیەمین كۆنگره‌ی پەکەکەیە كه‌ له‌ رۆژانی 5- ئایاردا ئه‌نجامی دا".

 

هۆزات گوتی: "وه‌ك نیازپاكی سه‌ركه‌وتنی پرۆسه‌ی (ئاشتی و كۆمه‌ڵگه‌ی دیموكراتی) و به‌ ئامانجی به‌رده‌وامیدان به‌ تێكۆشانی ئازادی و دیموكراسی و سۆسیالیزمیمان؛ له‌ حزوری ئێوه‌دا به‌ ئیراده‌ی ئازادی خۆمان، چه‌كه‌كه‌مان له‌نێو ده‌به‌ین".

 

لە بەشێکی دیکەی قسەکانیدا هاوسەرۆکی کەجەکە گوتی: "بڕوام به‌ هێزی سیاسه‌ت و ئاشتی كۆمه‌ڵایه‌تی هه‌یه‌، نه‌ك چه‌ك. داوا له‌ ئێوه‌ش ده‌كه‌م ئه‌م پره‌نسیپه‌ پەیڕەو بكه‌ن". 

 

هاوسەرۆکی کەجەکە گوتی، "تاوەکو ئێستا هیچ شتێك به‌ ئاسانی و بێ قوربانی و به‌بێ تێكۆشان به‌دینه‌هاتووه‌، به‌پێچه‌وانه‌وه‌ هه‌موو شتێك رۆژانه‌ به‌ قوربانی گه‌وره‌ و به‌ تێكۆشانی بێ وێنه‌ به‌ده‌ستخراوه‌. هه‌ڵبه‌ت له‌ ئێستا به‌دوایشه‌وه‌ هه‌ر به‌ تێكۆشانی سه‌خت و دژوار به‌رده‌وام ده‌بێت".

 

بەسێ هۆزات پەیامێکی ئاراستەی ژنان و گه‌نجان، كرێكار و ره‌نجده‌ران، هێزه‌ دیموكرات و سۆسیالیستییه‌كان، رۆشنبیر، نووسه‌ر، ئه‌كادیمیست، مافناس، هونه‌رمه‌ند و سیاسه‌تمه‌داران کرد و گوتی: "به‌شێوه‌یه‌كی راست و دروست له‌م هه‌نگاوه‌ مێژووییه‌مان تێبگه‌ن و له‌پاڵ ئێمه‌ و گه‌له‌كه‌ماندا بن.

 

بەسێ هۆزات داوایەکی دیکەشی هەبوو و گوتی، "داوا ده‌كه‌ین بۆ ئازادی جه‌سته‌یی رێبەر عەبدوڵڵا ئۆجەلان و چاره‌سه‌ری سیاسی و دیموكراتییانه‌ی پرسی كورد چالاكانه‌تر تێبكۆشن".

 

 

- ناوی راستەقینەی هۆلیا دۆرانە

- ساڵی 1978 لە دێرسیم لە دایکبووە

- خێزانەکەی سەر بە ئایینزای عەلەوین

- ساڵی 1994چووەتە ریزەکانی پەکەکە

- لەلایەن تورکیا و ئەمریکاوە داواکراوە

- 2013 بە هاوسەرۆکی (کەجەکە) هەڵبژێردرا