رووداو دیجیتاڵ
ئەندامێکی لیژنەی پڕۆژەی ئاوی گۆپتەپە بە رووداوی راگەیاند: ''لەسەرەتای وەرزی هاوینەوە کێشەی کەمئاوی رووی کردووەتە قەزای چەمچەماڵ و سنوورەکە"؛ ئاماژە بەوەش دەکات، هەوڵەکانیان خێرا کردوون بە مەبەستی چارەسەرکردنی کێشەکە.
رۆژی دووشەممە، 11 ئابی 2025، زیاد جاندار زۆراو، ئەندام لە لیژنەی پڕۆژەی ئاوی گۆپتەپە بە رووداوی راگەیاند: ''بێئاوی بەم وەرزی گەرمایە کێشەیەکی زۆری بۆ هاونیشتمانییانی سنووری چەمچەماڵ و تەکیە دروستکردووە. بەشێکی هاونیشتیمانییان ناچارن ئاو بکڕن بۆ پڕکردنەوەی پێداویستییەکانیان.''
زیاد جاندار گوتی: ''لە بەشێکی ناحیەی شۆڕش 12 رۆژ بۆ 15 رۆژ جارێک ئاو بەردەدرێتەوە؛ لە بەشێکی چەمچەماڵ 10 بۆ 12 رۆژ جارێک ئاو دەگاتە ماڵان؛ لە بەشێکی ناحیەی تەکیەش 8 رۆژ بۆ 9 رۆژ جارێک ئاو دەگاتە ماڵان.''
ئەندامەکەی لیژنەی ئاوی پڕۆژەی گۆپتەپە گوتیشی: ''لە پەیوەندیداین لەگەڵ بەڕێوبەرایەتیی ئاوی سلێمانی بۆ چارەسەری گرفتی کەمئاوی سنووری چەمچەماڵ. کارەکانی پڕۆژەی ئاوی گۆپتەپە بەردەوامن و پێشنیازی خێرا بۆ چارەسەرکردنی ئەم کێشەیە کراوە.''
زیاد جاندار زۆراو ئەوەشی خستەڕوو: ''نووسینگەی قوباد تاڵەبانی، جێگری سەرۆکوەزیرانی هەرێمی کوردستان هەوڵی چارەسەرکردنی پرۆژەی ئاوی چەمچەماڵ - گۆپتەپە دەدات و گرفتی ئەم کەمئاوییە نامێنێت و دەبێتە چارەسەرێکی ماوەدرێژ.''
لە بارەی هەمان کێشە، ئازاد گوڵەدین، دانیشتووی ناحیەی شۆڕش بە رووداوی راگەیاند، هەموو ئەو هەوڵانەی بۆ چارەسەرکردنی کێشەی بێ ئاوی لە چەمچەماڵ و دەوروبەری دراون، کاتی بوون و هیچ هەوڵێکی جدی بۆ چارەسەرکردنی ئەم کێشانە نەبووە.
ئازاد گوڵەدین گوتی: ''بەم گەرمای هاوینە 14 بۆ 15 رۆژ جارێک ئاوی ماڵان بەردەدرێتەوە، واتە دوو هەفتە جارێک. کاتی بەردانەوەی ئاویش لەنێوان کاژێرێک بۆ دوو کاژێرە کە ماوەیەکی کەمە و بەشی پڕبوونی تەنکی سەربان ناکات.''
ئازاد گوڵەدین گوتی، بەشێک لە هاونیشتمانییان ئاو دەکڕن وەک چارەسەری کێشەکە و "نرخی یەک تەنکەری بچووکی ئاویش لەنێوان 15 بۆ 25 هەزار دایە. هیوادارین لایەنی پەیوەندیدار زوو ئەم کێشەیە چارەسەربکات.''
10 ساڵە سنووری قەزای چەمچەماڵ کێشەی کەمئاوی هەیە و بڕیارە بە تەواوبوونی پرۆژەی ئاوی ( گۆپتەپە - چەمچەماڵ) کێشەکانیان کۆتایی بێت.
26ی حوزەیرانی 2024 نوسراوی کارکردن لە پڕۆژەی ئاوی چەمچەماڵ - گۆپتەپە کرا و 30ی هەمان مانگ کارکردن تێیدا دەستیپێکرد، بەڵام بەهۆی خەرجنەکردنی پارەوە نێوەڕاستی مانگی ئایار کارکردن بۆ ماوەیەک وەستا و دووبارە دەستی پێکردەوە.
ئەم هەواڵە لەلایەن رۆشنا شێرزاد ـەوە ئامادە کراوە
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ