رووداو دیجیتاڵ
سەرۆک بارزانی لە یادی شۆڕشی ئەیلوول پەیامێکی بڵاوکردەوە و رایگەیاند، شۆڕشی ئیرادە و بڕوابەخۆبوونی مرۆڤی كوردستانی بوو کە بناخەیەكی پتەو و رێكخراوی بۆ بەردەوامیی تێكۆشان و وەستانەوەی گەلی كوردستان لە دژی زۆرداری دانا.
ئەمڕۆ یەکشەممە 11-09-2022 یادی 61 ساڵەی هەڵگیرساندنی شۆڕشی ئەیلوولە. بەوبۆنەیەوە سەرۆک مەسعود بارزانی لە راگەیێندراوێکدا ئەو یادەی بە خەباتی نەتەوایەتی و دیموكراسیخوازی گەلی کورد ناوبرد و گوتی، "هەموو پێكهاتە نەتەوەیی و ئایینییەكانی كوردستانیش شانبەشانی كورد بە رابەرایەتیی جەنابی بارزانیی نەمر لە دژی ستەم و داگیركاری خەباتیان كرد".
سەرۆک بارزانی لە بەشێکی پەیامەکەیدا دەڵێت، شۆڕشی ئەیلوول بە "بەها بەرزەكانییەوە و بە پێداگری و خۆڕاگریی سەركردایەتی و پێشمەرگە و جەماوەر، وایكرد دۆزی رەوای گەلی كوردستان هەنگاوی زۆر گەورە بەرەو پێشەوە بنێت و ببێتە سەرچاوەی هێز بۆ قۆناخەكانی تری خەباتی گەلی كوردستان و هەروەها سەرچاوەی ئیلهام بۆ تێكۆشەر و خەباتگێڕان لە هەموو پارچەكانی تری كوردستان."
دەقی پەیامی سەرۆک بارزانی بەبۆنەی 31 ساڵەی هەڵگیرسانی شۆڕشی ئەیلوول:
بەناوی خودای بەخشندە و میهرەبان
ئەمڕۆ شەست و یەك ساڵ بەسەر هەڵگیرساندنی شۆڕشی مەزنی ئەیلوولدا تێدەپەڕێ. لەو شۆڕشە سەرتاسەرییەی گەلی كوردستاندا هەموو چین و توێژەكانی كۆمەڵگە بەشداری خەباتی نەتەوایەتی و دیموكراسیخوازی گەلەكەیان بوون و هەموو پێكهاتە نەتەوەیی و ئایینییەكانی كوردستانیش شانبەشانی كورد بە رابەرایەتیی جەنابی بارزانیی نەمر لە دژی ستەم و داگیركاری خەباتیان كرد.
شۆڕشی ئەیلوول شۆڕشی ئیرادە و بڕوابەخۆبوونی مرۆڤی كوردستانی بوو و بناخەیەكی پتەو و رێكخراوی بۆ بەردەوامیی تێكۆشان و وەستانەوەی گەلی كوردستان لە دژی زۆرداری دانا. شۆڕشی ئەیلوول بە بەها بەرزەكانییەوە و بە پێداگری و خۆڕاگریی سەركردایەتی و پێشمەرگە و جەماوەر وای كرد دۆزی رەوای گەلی كوردستان هەنگاوی زۆر گەورە بەرەو پێشەوە بنێت و ببێتە سەرچاوەی هێز بۆ قۆناخەكانی تری خەباتی گەلی كوردستان و هەروەها سەرچاوەی ئیلهام بۆ تێكۆشەر و خەباتگێڕان لە هەموو پارچەكانی تری كوردستان.
لە شەست و یەكەمین ساڵیادی شۆڕشی ئەیلوولدا پێزانینم بۆ رۆڵ و ماندوونەناسیی دایكان و ژنان و هەموو ئەو پێشمەرگە و خەباتگێڕ و قارەمانانە هەیە كە رۆڵیان لەو شانازییە نیشتیمانییەدا هەبووە. چ ئەو قارەمانانەی لە شۆڕشی ئەیلوولدا شەهید بوون و یانیش لە ژیاندا نەماون و، چ ئەو رۆڵەسەربەرزانەی بەشداریی شۆڕش بوونە و هێشتا لە ژیاندا ماون. ئەو قارەمانانە مێژوویان بۆ گەلەكەیان دروست كرد و جێگەی شانازی و سەربەرزیین بۆ هەموومان.
مسعود بارزانی
11ی ئەیلوولی 2022
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ