رووداو دیجیتاڵ
کۆمەڵی دادگەریی کوردستان لە بازنەی کەرکووک، نەینەوا، دیالە و سەلاحەدین هیچ بەربژێرێکی نییە و تاوەکو ئێستاش بڕیاری نەداوە دەنگەکانی بۆ کام لایەن و بەربژێر بێت. یەکگرتووی ئیسلامیی کوردستانیش لە سنووری ئەو چوار پارێزگایە تاکە بەربژێرێکی لە کەرکووک هەیە.
ئەمڕۆ شەممە، بێستوون حەمەساڵح، بەرپرسی مەکتەبی هەڵبژاردن و ئاماری کۆمەڵی دادگەریی کوردستان بە تۆڕی میدیایی رووداوی راگەیاند، لە بازنەی کەرکووک، نەینەوا، دیالە و سەلاحەدین هیچ بەربژێرێکیان نیە و تاوەکو ئێستاش بڕیاریان نەداوە کادیر و جەماوەریان ئاگادار بکەنەوە دەنگ بە کام لایەن و بەربژێر بدەن.
بێستوون حەمەساڵح گوتی، بڕیارە ئەنجوومەنی سەرکردایەتیی کۆمەڵ کۆببێتەوە و بڕیار لەوبارەوە بدات.
بە گوتەی بەرپرسی مەکتەبی هەڵبژاردن و ئاماری کۆمەڵی دادگەریی کوردستان، ئەو حیزبە لە سنووری ئەو پارێزگایانە نزیکەی 10 هەزار دەنگی هەیە و چوار هەزاریان لە سنووری کەرکووکە.
هاوکات هێمن ئەسکەندەر، بەرپرسی دەزگای هەڵبژاردنی یەکگرتووی ئیسلامی کوردستان بە رووداوی راگەیاند، لە سنووری پارێزگاکانی دیالە، سەلاحەدین و نەینەوا، هیچ بەربژێرێکیان نییە و لە کەرکووکیش تەنیا یەک بەربژێریان هەیە.
سەرچاوەیەک لە یەکگرتووی ئیسلامی کوردستان بە رووداوی راگەیاند، تاوەکو ئێستا خۆیان یەکلایی نەکردووەتەوە کە لەو بازنانەی بەربژێریان نیە دەنگ بە کام لیست و بەربژێر بدەن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ