رووداو دیجیتاڵ
سەرۆکی زانکۆی سەلاحەدین رایگەیاند، هەفتەی داهاتوو دەرماڵەی چوار مانگی خوێندکاران بۆ ساڵی خوێندنی 2022 و 2023 خەرج دەکرێت و خوێندکاران دەتوانن وەریبگرن.
رۆژی چوارشەممە، 12-07-2023، زانکۆی سەلاحەدین راگەیێندراوێکی لەبارەی دەرماڵەی خوێندکارانی زانکۆکە بڵاوکردەوە و رایگەیاند، "لە ژێر راسپاردەی سەرۆکی حکومەتی هەرێمی کوردستان و بەدواداچوونی پ.ی.د. کامەران یونس محەممەد ئەمین، سەرۆکی زانکۆی سەلاحەدین، یاریدەدەری سەرۆکی زانکۆ بۆ کاروباری کارگێڕی و دارایی و بەڕێوەبەری دارایی سەرۆکایەتیی زانکۆ دەرماڵەی چوار مانگی قوتابییان بۆ ساڵی خوێندنی 2022 و 2023 بەیەکەوە دابەشدەکرێت."
دکتۆر کامەران یونس محەممەد ئەمین، سەرۆکی زانکۆی سەلاحەدین بە تۆڕی میدیایی رووداوی گوت، دەرماڵەی مانگەکانی 10، 11 و 12ـی 2022، هەروەها مانگی کانوونی دووەمی 2023 بەیەکەوە خەرج دەکەن.
نزیکەی 21 هەزار خوێندکاری زانکۆی سەلاحەدین لە پاڵپشتیی دارایی سوودمەند دەبن. سەرۆکی زانکۆکە دەڵێت، "پارەکە خەرجکراوە و لە بانک کراوەتە چەک و هەفتەی داهاتوو قوتابییان دەتوانن دەرماڵەکانیان وەربگرن."
رۆژی چوارشەممە، 22-2-2023، مەسرور بارزانی، سەرۆکی حکومەتی هەرێمی کوردستان رەزامەندیدا لەسەر بەردەوامی و خەرجکردنی زیاتر لە حەوت ملیار و 250 ملیۆن دیناری مانگانە وەک پاڵپشتی بۆ قوتابییان و خوێندکارانی زانکۆ و پەیمانگاکانی ھەرێمی کوردستان و دابینکردنی خزمەتگوزاریی بەشە ناوخۆییەکان بۆ ساڵی خوێندنی 2022 و 2023.
بەگوێرەی بڕیارەکەی حکومەتی هەرێمی کوردستان بێت، ئەو گوژمەیە ھاوشێوەی ساڵی خوێندنی 2021 و 2022ـە و لەسەر بودجەی زانکۆ و پەیمانگەکان تەرخان دەکرێت.
بڕی پاڵپشتییە داراییەكە 40 هەزار دینارە بۆ خوێندكارانی ناوشار و 60 هەزار دیناریش بۆ خوێندکارانی دەرەوەی شار.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ