سووتانی پاڵاوگەیەکی نایاسایی لەسەر رێگەی هەولێر - گوێڕ. وێنە: بڵند تاهیر - رووداو
رووداو دیجیتاڵ
پارێزگاری هەولێر دەڵێت، بەهۆی ئەوەی پاڵاوگەکان دەرفەتی کاریان رەخساندووە و سووتەمەنییەکەشیان پێویستیی خەڵکە، سەرقاڵی پلانێکن بۆ دابینیکردنی زەوی بۆیان لە دەرەوەی شار.
ئەمڕۆ دووشەممە، ئومێد خۆشناو، پارێزگاری هەولێر لە کۆنفرانسێکی رۆژنامەڤانیدا گوتی: "پاڵاوگەکان سەرچاوەی ژیانی بەشێکی خەڵکن، بەڵام نابێت بەشێک بن لە تێکدانی ژینگەی شار".
سەرەتای ئەم مانگە لە سنووری پارێزگای هەولێر 138 پاڵاوگەی نایاسایی هەبوون. 3ـی ئەم مانگە، ئومێد خۆشناو لە کۆنفرانسێکی رۆژنامەڤانیدا رایگەیاند، هەموویان دادەخەن. لەبارەی بڕیارەکەوە پارێزگاری هەولێر ئەمڕۆ گوتی، "بڕیاری داخستنی کارگەکان وەک خۆی ماوە".
هەر لەبارەی پاڵاوگەکانەوە پارێزگاری هەولێر ئاماژەی بەوەکرد، بەرهەمەکەیان "سووتەمەنییە و پێویستی ژیانە. دەبێت شێوەیەک بدۆزینەوە بۆ کارکردنیان لە دەرەوەی شار، چونکە دەرفەتی کارە و سووتەمەنییەکەش پێویستیی هاووڵاتیانە. لە پلاندایە و کاری بۆ دەکرێت لە دەرەوەی شارەکان زەوییان بۆ دابینبکرێت".
ئومێد خۆشناو گوتی، نەوەک پاڵاوگەکان، بەڵکو موەلید، ئۆتۆمبێل، کارگە یان هەر شتێکی دیکە ژینگە پیس بکات، لێپێچینەوەی یاسایی لەگەڵ خاوەنەکەی دەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ