چەند هاونیشتمانییەکی بەتەمەن
رووداو دیجیتاڵ
پیربوونی دانیشتووان بووەتە کێشەیەکی جیدی لە پارێزگای سنە.
ئێستا رێژەی بەساڵاچوون لە سنە، تەنانەت 1.4٪ لە ئاستی تێکرای ئێران بەرزترە.
بەڕێوەبەری بەڕێوەبەرایەتیی خۆشبژێویی سنە دەڵێت: "بەپێی داتاکان، 13.4٪ی دانیشتووانی پارێزگای سنە بەساڵاچوون، بەو جۆرەش سنە لەسەر ئاستی ئێران لەنێو 31 پارێزگا لە ریزی 15دایە".
زیاتر لە 216 هەزار بەساڵاچوو لە سنە هەن؛ 121 هەزار ژن و 95 هەزار پیاو.
زۆرترین بەساڵاچووی پارێزگاکە لە شاری سنەن کە 46 هەزار کەسن.
کێشەکە لەسەر ئاستی ئێرانیش هەیە و ئێستا زیاتر لە 10.5 ملیۆن بەساڵاچوو لەو وڵاتەدا هەن کە دەکاتە 12٪ی کۆی دانیشتووان. مەزەندە دەکرێت ئەو ژمارەیە لە 2050 بگاتە 30 ملیۆن و رێژەکەش 31٪.
هۆکاری سەرەکی، دابەزینی بەرچاوی هاوژینی و کەمبوونەوەی رێژەی لەدایکبوونە.
بەپێی ئامارێکی وەزارەتی وەرزش و گەنجانی ئێران، 17 ملیۆن گەنج لە ئێران کە تەمەنیان لە خوار 45 ساڵە، ژیانی هاوژینییان پێکنەهێناوە.
ئەسکەندەر موئمینی، وەزیری ناوخۆی ئێران دەڵێت: "بەداخەوە لە داهاتوودا رووبەڕووی مەترسییەکی زۆر جیدی دەبینەوە. نامەوێ کەس بترسێنم، بەڵام ئەگەر بەم شێوەیە بەردەوام بین، دۆخەکەمان باش نابێ. زۆربەی رێوشوێنەکانمان ئابوورین. پێمان وایە بە چارەسەرکردنی کێشە ئابوورییەکان، ژمارەی دانیشتووانمان زیاد دەکات، بەڵام بەشێکی کێشەکە کولتوورییە."
بەرپرسانی حکومەتی ئێران لەبارەی مەترسییەکانی بەرزبوونەوەی ژمارەی بەساڵاچووان هۆشداری دەدەن و دەڵێن، لەبەر ئەوەی کۆمەڵگە بەرەو پیربوون هەنگاو دەنێت، ژمارەی گەنجان و دەستی کار لەو وڵاتە کەمتر دەبێ و لێکەوتەی خراپی ئابووری لێدەکەوێتەوە. ئەوە جگە لەوەی مەترسیی بۆ سەر ئاسایشی نیشتمانیی وڵاتەکەش دروست دەکات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ