رووداو دیجیتاڵ
ئەنجوومەنی مامۆستایانی ئێران رایگەیاند، هێزە ئەمنییەکان لە شاری سەقزی پارێزگای سنە، تۆمەتی بێ بنەمایان داوەتە پاڵ سێ چالاکڤانی پیشەیی مافی مامۆستایان و بەو هۆیەوە دادگایی دەکرێن.
ئەنجوومەنی پیشەیی مامۆستایانی ئێران لە راگەیێندراوێکدا دەڵێ، تاهیر قادرزادە، ئەحمەد قادری و سولەیمان عەبدی کە سێ مامۆستا و چالاکڤانی پیشەیی دیاری مافی مامۆستایانن لە شاری سەقز، بانگکراونەتە ئیتلاعات و تۆمەتی بێ بنەما و ناڕاستیان دراوەتە پاڵ و ئیتلاعات هەوڵ دەدات بەو تۆمەتانە لە دادگەی سەقز دۆسێی نوێیان بۆ بکاتەوە و داوای سزادانیان بکات.
ئەو سێ چالاکڤانە پیشەییە بە تێکدانی ئارامیی کۆمەڵگە تۆمەتبارکراون، بەڵام تاوەکو ئێستا کاتی دادگاییکردنیان پێڕانەگەیێنراوە.
ئەنجوومەنی پیشەیی مامۆستایانی ئێران داوا دەکات، حکومەت و هێزە ئەمنییەکانی ئێران کۆتایی بە روانینی ئەمنی لەسەر چالاکی پیشەیی و پەروەردەیی بهێنن.
تاهیر قادرزادە، ئەحمەد قادری و سولەیمان عەبدی ئەندامی دەستەی بەڕێوەبەریی لقی سەقزی ئەنجوومەنی پیشەیی مامۆستایانی کوردستانن.
ئەو سێ هاونیشتمانییە ساڵی 2022 لەگەڵ ژمارەیەک مامۆستای دیکەی سەقز بەهۆی بەشداریکردن لە گردبوونەوە و ناڕەزایی مامۆستایان دەستبەسەرکران و دواتر ئازادکران.
مامۆستایانی قوتابخانە لە رۆژهەڵاتی کوردستان و ئێران لە ساڵانی 2021 و 2022 چەندین جار بۆ داواکردنی داواکارییە پیشەییەکانیان گردبوونەوە و مانیان گرت. بەهۆی بەشداریکردن لەو ناڕەزایەتییانە، ژمارەیەک مامۆستا بە دەرکردن، دوورخرانەوە، خانەنشینی ناچاری یان دابەزاندنی پلەی مامۆستایەتییان سزا دراون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ