رووداو دیجیتاڵ
شانەی راگەیاندنی ئەمنیی عێراق رایدەگەیێنێت، سێ چەکداری داعشیان لە کەرکووک دەستگیرکردووە، یەکێکیان بەرپرسێکی ئەمنیی رێکخراوەکەیە. دەشڵێت، داعش لە کەرکووک خۆی رێکخستووەتەوە و کار بۆ "تیرۆرکردنی" ئەوانە دەکات کە سەر بە سوپا و پۆلیسن.
شانەی راگەیاندنی ئەمنی عێراق رۆژی سێشەممە، 13-06-2023، لە راگەیێندراوێکدا بڵاویکردەوە، "هێزەکانی هەواڵگری و لێکۆڵینەوەی فیدراڵی سەر بە وەزارەتی ناوخۆی عێراق بە هەوڵی چڕی هەواڵگری و زانیاریی ورد، سێ تیرۆریستیان دەستگیر کرد کە بەپێی مادەی چواری تیرۆر لە یاسای بەرەنگاربوونەوەی تیرۆر داواکراون و یەکێکیان لێپرسراوی ئەمنیی ناوچەکە بووە و هێزەکانی لە پارێزگای کەرکووک کاریان کردووە".
شانەی راگەیاندنی ئەمنیی عێراق دەشڵێت: "بەپێی زانیاری و بەڵگەنامەکان، کەسانی لە یاسادەرچوو، هێرشی پچڕپچڕ لە دژی هێزە ئەمنییەکان دەکەن و هێزەکانیان لە کەرکووک رێکخستووەتەوە بۆ تیرۆرکردنی ئەوانەی سەر بە سوپا و پۆلیسن لە حەویجە و ریاز و مولتەقا".
بەرەبەیانی رۆژی یەکشەممە، 11-06-2023 چەکدارانی داعش لە دوو قۆڵەوە هێرشیان کردە سەر سەنگەری هێزە عێراقییەکان لە سنووری شارۆچکەی تەلوەرد و کوژراو و برینداری لێکەوتەوە.
هێرشەکە بە چەکی سووک و مامناوەند ئەنجامدرا و بە هۆیەوە دوو ئەفسەر و سەربازێکی سوپای عێراق کوژراون، هاوکات چوار سەربازی دیکەش برینداربوونە و چەکدارەکانیش هەڵاتوون.
ئەوانەی کوژراون بریتیبوون لە: عەبدوڵڵا حامد، پلەی موقەدەم، حەکەم کازم، پلەی مولازمی یەک و یاسر خزەیرە، سەرباز. هەر سێکیشیان خەڵکی باشووری عێراقن. بریندارەکانیش، ناویان قاید ساڵح، واسق تاهیر، فەلاح تاهیر و کەڕار حەیدەرە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ