رووداو دیجیتاڵ
بەهۆی هێرشی درۆنی و مووشەکیی ئێرانەوە بۆ سەر ئیسرائیل، شەوی رابردوو فڕۆکەیەکی فلای ئەربیل کە لە دانیمارکەوە بۆ هەولێر دەهات، ناچاربوو رێڕەو بگۆڕێت و بچێتە بولگاریا. بەڕێوەبەری رێگەپێدراوی کۆمپانیا فڕۆکەوانییەکە دەڵێت، ئەمڕۆ فڕۆکەکەیان دەگاتەوە هەولێر.
فڕۆکەکە دوێنی لە فڕۆکەخانەی کۆپنهاگنی دانیمارکەوە بۆ هەولێر فڕی بوو، بەڵام داخرانی ئاسمانی عێراق و چەند وڵاتێکی ناوچەکە ناچاری کرد رێڕەو بگۆڕێت و چووە فڕۆکەخانەی سۆفیا لە بولگاریا و تاوەکو ئێستا لەو فڕۆکەخانەیەیە.
لاوەند مەمووندی، بەڕێوەبەری رێگەپێدراوی کۆمپانیای فلای ئەربیل ئەمڕۆ یەکشەممە بە تۆڕی میدیایی رووداوی گوت، "ئەو فڕۆکەیەمان کە لە فڕۆکەخانەی سۆفیایە، ئەمڕۆ دەگەڕێتەوە هەولێر."
فڕۆکەکە 176 سەرنشینی هەڵگرتووە و ئامادەکارییەکان بۆ فڕینی دەستیپێکردووە، پێدەچێت نزیک کاژێر 14:00 بەرەو هەولێر بەڕێبکەوێت.
لاوەند مەمووندی گوتیشی، ئاسمانی ناوچەکە ئاسایی بووەتەوە و ئەمڕۆ نزیکەی کاژێر 11:00 فڕۆکەیەکی کۆمپانیاکەیان بەرەو عەممان بەڕێکەوتووە و بەردەوامە لە گەشتەکەی.
شەوی رابردوو ئێران بە نزیکەی 300 درۆن و مووشەک هێرشی کردە سەر ئیسرائیل، هەندێک لە درۆنەکانی ئێران بەسەر خاکی هەرێمی کوردستانەوە ئاراستەی ئیسرائیل کران، لەلایەن سیستەمی بەرگریی هاوپەیمانانەوە خرانە خوارەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ