هەڵەیەک روویدا! دووبارە هەوڵبدە
رووداو دیجیتاڵ
دەستەی سەربەخۆی مافی مرۆڤ لە هەرێمی کوردستان، وردەکاریی سەردانەکەی شاسوار عەبدولواحید، سەرۆکی جووڵانەوەی نەوەی نوێ لە گرتووخانەی سلێمانی ئاشکرا دەکات و رایدەگەیێنێت، شاسوار عەبدولواحید پێیوابووە کەیسەکەی "سیاسییە" و پەیوەندیی بە نزیکبوونەوەی هەڵبژاردنەکانی پەرلەمانی عێراقەوە هەیە.
سلێمان موحسین، گوتەبێژی دەستەی سەربەخۆی مافی مرۆڤ لە هەرێمی کوردستان، لە بووڵتەنی کاژێر 12:00ـی تۆڕی میدیایی رووداودا کە سەنگەر عەبدولڕەحمان پێشکێشی دەکات رایگەیاند، "دوێنێ شاندێکی دەستەکە بە سەرۆکایەتیی دکتۆرە مونا، سەرۆکی دەستەکە سەردانی شاسوار عەبدولواحیدیان کرد، لە گرتن و گواستنەوەی سلێمانی، نزیکەی 20 خولەک لەگەڵی دانیشتن."
بە گوتەی گوتەبێژی دەستەی مافی مرۆڤ، شاسوار عەبدولواحید پێیوابووە دەستگیرکردنەکەی سیاسییە و گوتوویەتی: "ئەم سکاڵایە ساڵی 2019 لەسەر من تۆمار کراوە، بۆچی لەم کاتەدا جێبەجێ دەکرێت؟ هۆکارەکەی نزیکبوونەوەی هەڵبژاردنی پەرلەمانی عێراقە."
سەبارەت بە سکاڵاکە، شاسوار عەبدولواحید بە شاندی دەستەکەی گوتووە: "ئەو ژمارە تەلەفۆنەی گوایە هەڕەشەی پێکراوە هی من نییە، بەڵکو هی لایەنێکی ئەمنی- سیاسیی زۆنی سلێمانییە."
هەروەها ئاماژەی بەوەشکردووە کە پێش دەرچوونی بڕیاری دادگا بە غیابی، شوێنی نیشتەجێبوون و ئۆفیسەکەی لە سلێمانی دیار بووە و خۆی نەشاردووەتەوە، بۆیە "دەیانتوانی ئەو کاتیش دەستگیرم بکەن."
سلێمان موحسین باسی لەوە کرد کە شاسوار عەبدولواحید لە ژوورێکی تایبەتدا بووە و تەندروستیی باش بووە. سەبارەت بە مامەڵەی هێزە ئەمنییەکان، شاسوار عەبدولواحید گوتوویەتی: "برادەرانی پۆلیس هاوکارن و رێزیان لێگرتووم و هیچ کێشەیەکم لەگەڵیان نییە."
گوتەبێژی دەستەکە ئەوەشی خستەڕوو کە شێوازی دەستگیرکردنەکە بەبێ تووندوتیژی بووە و بەڕێوەبەری پۆلیسی سلێمانیش پێی راگەیاندوون کە کەلەپچەیان بۆ بەکارنەهێناوە و دوو ئەفسەریان بۆ پاراستنی لەگەڵدا بووە.
دەستەی مافی مرۆڤ جەخت دەکاتەوە کە وەک دامەزراوەیەکی بێلایەن کار دەکەن و رێز لە بڕیارەکانی دادگا و سەروەریی یاسا دەگرن، بەڵام هاوکات تێبینیی یاسایی خۆیان لەسەر کۆی پرۆسەکە هەبووە و پێشکەشی لایەنە پەیوەندیدارەکانیان کردووە.
لە ئەنجامی بەدواداچوونی دەستەکەدا، رێگە بە پارێزەری شاسوار عەبدولواحید دراوە تانە لەو بڕیارە بدات کە بە غیابی بۆی دەرچووە و بڕیارە رۆژی 24ی مانگ دانیشتنێکی دیکەی دادگا بۆ کەیسەکە بەڕێوەبچێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ