هەڵەیەک روویدا! دووبارە هەوڵبدە
نەخۆشخانەی گشتیی گولان لە ئاکرێ.
رووداو دیجیتاڵ
پزیشکێک لە ئاکرێ دەرمان، دەرزی و ئامێری پزیشکی لە نەخۆشخانەی گشتیی گولان (نەخۆشخانەی سەرەکیی شارەکە) و نەخۆشخانەی منداڵبوونی ئاکرێ دەدزێت و دەستگیر دەکرێت.
سەرچاوەیەک لە تەندروستیی ئاکرێ بە تۆڕی میدیایی رووداوی راگەیاند، دوای بەدواداچونی ورد، "بۆمان دەرکەوت پزیشکێکی بێهۆشکردن دزیی لە نەخۆشخانەکان دەکات و لەسەر سکاڵای ئێمە دەسگیرکراوە."
بەپێی زانیارییەکانی رووداو، ئەو پزیشکە بە رەگەز عەرەبە و خەڵکی بەغدایە؛ ماوەی چەندین ساڵە لە نەخۆشخانەکانی ئاکرێ کار دەکات.
لەسەر چۆنییەتی دزینەکە، سەرچاوەکە گوتی، ئەو دەرمانانەی کە لە نەخۆشخانەکان ماوەیان بەسەردەچوو و دادەنران بۆ ئەوەی بسووتێنرێن، ئەو پزیشکە دەیدزین و لە یەکێک لە کۆمەلگە پزیشکییە ئەهلییەکان ساخیدەکردنەوە.
ئەو سەرچاوەیە کە لەبەر هەستیاریی بابەتەکە نەیویست ناوی ئاشکرا بکرێت، گوتیشی: "پزیشکەکە بێجگە لە دەرمانی ماوە بەسەرچوو دەرزی و سێ ئامێری پزیشکیشی بردووە کە نرخەکانیان لە نێوان 25 هەزار بۆ 50 هەزار دۆلار بووە."
هەفتەیەک پێش جەژنی رەمەزان پزیشکەکە دەستگیرکراوە و لەکاتی دەسگیرکردنی، لە ماڵەکەیدا دەست بەسەر بڕی 200 ملیۆن دینار دا گیرا کە گومان دەکرێت لە فرۆشتنی دەرمان و ئامێرەکان دەستیکەوتبێت.
پەڕاوی لێکۆلینەوە بۆ کەیسەکە کراوەتە و لێکۆڵینەوەکان بەردەوامن. گوماندەکرێت کەسانی دیکە (پزیشک) دەستیان لە دزییەکەدا هەبووبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ